მსოფლიო

უკრაინის 10 ოლქში საომარი მდგომარეობა გამოცხადდა - უმაღლესმა რადამ პეტრო პოროშენკოს ინიციატივას მხარი დაუჭირა

უკრაინის უმაღლესმა რადამ მხარი დაუჭირა ქვეყნის პრეზიდენტის, პეტრო პოროშენკოს წინადადებას უკრაინაში საომარი მდგომარეობის გამოცხადების შესახებ.

წინადადების მიხედვით, საომარი მდგომარეობა 26 ნოემბრიდან 25 იანვრამდე გაგრძელდება, თუმცა კონსულტაციების შედეგად გადაწყვიტეს საომარი მდგომარეობის ხანგძლივობის 30 დღემდე შემცირება. ასევე გადაწყდა, რომ საპრეზიდენტო არჩევნები, როგორც იგეგმებოდა, გაიმართება 2019 წლის 31 მარტს.

პოროშენკომ განხილვისას განაცხადა, რომ საომარი მდგომარეობა უკრაინის ყველა რეგიონზე არ გავრცელდება, არამედ ვინიცის, ლუგანსკის, ნიკოლაევის, ოდესის, სუმის, ხარკოვის, ჩერნიგოვის, ასევე დონეცკის, ზაპოროჟიეს, ხერსონის ოლქებსა და უკრაინის შიდა წყლებზე აზოვის ზღვის-ქერჩის აკვატორიაში.

ცნობისთვის, 25 ნოემბერს რუსეთის სამხედრო საზღვაო ფლოტის ხომალდებმა უკრაინის კატარღებს ოდესის პორტიდან მარიუპოლის პორტში გადაადგილების დროს ცეცხლი გაუხსნეს. ინციდენტის შედეგად, უკრაინის ექვსი მოქალაქეა დაშავებული. უკრაინის პრეზიდენტის წარმომადგენლის ცნობით, რუს მესაზღვრეებს 20-ზე მეტი უკრაინელი სამხედრო ჰყავთ დაკავებული. უკრაინამ რუსეთის მოქმედებები აგრესიად შეაფასა.