კომენტარი

უკრაინაში გუშინ დამარცხდა ოლიგარქი, რომელიც გაცილებით უფრო მდიდარია, ვიდრე ივანიშვილი - ნიკა მელია

უკრაინაში გუშინდელი არჩევნები იყო საარჩევნო უბნებთან რევოლუცია და დარწმუნებით შემიძლია გითხრათ, იგივე მოხდება საქართველოშიც, უკრაინაში გუშინ საარჩევნო ურნებთან რევოლუცია მოხდა. დამარცხდა ოლიგარქი, რომელიც გაცილებით უფრო მდიდარია, ვიდრე ივანიშვილი, – ამის შესახებ „ნაციონალური მოძრაობის“ წევრმა, ნიკა მელიამ განაცხადა.

„დარწმუნებული ვარ, უკრაინაში გუშინ განვითარებული მოვლენები, ანუ ოლიგარქატის დამარცხება, მხოლოდ ძალას შემატებს ქართული ოპოზიციური ძალების ბრძოლას ქართული ოლიგარქატის წინააღმდეგ. მე მჯერა, მიხეილ სააკაშვილს უკრაინაში დაბრუნების საშუალება მიეცემა, რადგან ის უკანონოდ იყო ქვეყნიდან გამოძევებული.

რაც გუშინ უკრაინაში მოხდა, ნიშანდობლივია ერთი ძალიან მნიშვნელოვანი თვალსაზრისით, დამარცხდა ოლიგარქი, რომელიც გაცილებით უფრო მდიდარია, ვიდრე ივანიშვილი. მან ვერ შეინარჩუნა ხელისუფლება, რატომ? იმიტომ, რომ მას არაფერი უკეთებია წლების განმავლობაში, ისევე როგორც ბიძინა ივანიშვილი არაფერს აკეთებს.

გუშინდელი არჩევნები იყო უკრაინის რეფერენდუმი. ეს იყო რევოლუცია საარჩევნო უბნებთან და დარწმუნებით შემიძლია გითხრათ, იგივე მოხდება საქართველოშიც, ხალხი უარს ეტყვის ბიძინა ივანიშვილს, ჩხარტიშვილს, გომელაურებსა და გახარიას“, – განაცხადა ნიკა მელიამ.

უკრაინაში ბიულეტენების 85 პროცენტის დათვლის შემდეგ, პრეზიდენტობის კანდიდატ ვლადიმირ ზელენსკის ხმათა 73,20 პროცენტი აქვს. უკრაინის ცენტრალური საარჩევნო კომისიის მონაცემებით, მოქმედმა პრეზიდენტმა, პეტრო პოროშენკომ 24,46 პროცენტი მიიღო.