მსოფლიო

უკრაინაში დეპორტირებულმა მიხეილ სააკაშვილმა ანგელა მერკელსა და ევროკავშირს დახმარება სთხოვა

უკრაინიდან დეპორტირებულმა საქართველოს ექს-პრეზიდენტმა და ოდესის ყოფილმა გუბერნატორმა მიხეილ სააკაშვილმა ევროკავშირსა და გერმანიის ფედერალურ კანცლერ ანგელა მერკელს დახმარება სთხოვა.

„კიევის კაფეში ნიღბიანი მამაკაცები თავს დამესხნენ, მათ გამიტაცეს, მემუქრებოდნენ და გამიყვანეს კერძო თვითმფრინავით პოლონეთში. ამ აქციის უკან უკრაინის კორუმპირებული პრეზიდენტი პეტრო პოროშენკო დგას“, -უთხრა სააკაშვილმა გაზეთ Bild-ს.

სააკაშვილმა მერკელსა და ევროკავშირს მხარდაჭერისკენ მოუწოდა. მისი თქმით, თუ ისინი არ მიაქცევენ ყურადღებას, უკრაინა დამარცხდება.

„პოროშენკო ამ ქვეყანას ანგრევს და ჩემი მოშორება სურს, რადგან კორუფციას ვამხელ“, -თქვა სააკაშვილმა და დაამატა, რომ უკრაინაში „კანონიერი გზით“ დაბრუნდება.

გუშინ სპეცრაზმელთა ჯგუფმა სააკაშვილი კიევში, რესტორან „სულგუნში“ დააკავა. შემდეგ ოდესის ექს-გუბერნატორი კერძო თვითმფრინავით პოლონეთში გადაიყვანეს „რეადმისიასთან“ [არალეგალის იმ ქვეყანაში დაბრუნება, საიდანაც ის არალეგალურად შევიდა სხვა სახელმწიფოში] დაკავშირებული განცხადების მიხედვით, რომელიც პოლონურ მხარეს უკრაინის ეროვნულმა საიმიგრაციო სამსახურმა მიაწოდა.