მსოფლიო

უკრაინაში არაფერს ველით, სანამ პუტინს არ შევხვდები - დონალდ ტრამპი

აშშ-ის ყოფილი პრეზიდენტი დონალდ ტრამპი აცხადებს, რომ უკრაინასა და რუსეთს შორის მშვიდობის მიღწევის პერსპექტივა უშუალოდ მისი და ვლადიმერ პუტინის შეხვედრაზეა დამოკიდებული.

„არაფერი არ მოხდება, სანამ პუტინი და მე არ შევხვდებით, ხომ გასაგებია? ის არ აპირებდა წასვლას, ეგონა, რომ მე მივდიოდი. თუ მე არ ვიქნებოდი, ისიც არ წავიდოდა. და არაფერი მოხდება — გინდ მოგწონდეთ, გინდ არა — სანამ ჩვენ ერთად არ ვიქნებით. ეს საკითხი მოგვარდება, რადგან ძალიან ბევრი ადამიანი იღუპება,“ — განუცხადა ტრამპმა ჟურნალისტებს პრეზიდენტის თვითმფრინავში, როცა აბუ დაბიში დაეშვა.

ტრამპი ასევე შეეხო რუსეთის დელეგაციას, რომელიც ხუთშაბათს თურქეთში ჩავიდა უკრაინასთან მაღალი დონის მოლაპარაკებებისთვის, თუმცა მის შემადგენლობაში პუტინი არ იყო. „ამაში არანაირად არ ვარ იმედგაცრუებული,“ — აღნიშნა მან.
„რატომ უნდა ვიყო იმედგაცრუებული? ჩვენ ახლახან 4 ტრილიონი დოლარი მივიღეთ და თქვენ დელეგაციაზე მეკითხებით? არაფერი ვიცი დელეგაციის შესახებ, ჯერ არც შემიმოწმებია,“ — განაცხადა ტრამპმა.

უკრაინის პრეზიდენტმა ვოლოდიმირ ზელენსკიმ კი განაცხადა, რომ თურქეთში მხოლოდ პუტინთან შეხვედრას განიხილავს და რუსეთის დელეგაციას, რომელიც მოლაპარაკებებზე ჩავიდა, „ყალბი“ უწოდა.

ტრამპმა დასძინა, რომ თურქეთში ვიზიტი კვლავ დღის წესრიგშია: „თუ რაღაც მოხდება, პარასკევს წავალ, თუ შესაბამისი იქნება,“ — განაცხადა მან დოჰაში ბიზნესრაუნდზე.

დონალდ ტრამპს 2024 წლის საპრეზიდენტო კამპანიის ფარგლებში არაერთხელ დაუყენებია პირობა, რომ პრეზიდენტად არჩევის პირველივე დღეს ომს დაასრულებს, თუმცა მოგვიანებით თქვა, რომ ეს განცხადება გადაჭარბებული იყო.