მსოფლიო

უკრაინა მზად არის მშვიდობისთვის. რუსეთმა უნდა აჩვენოს, მზად არის თუ არა ომის დასასრულებლად – თუ აპირებს მის გაგრძელებას - ვოლოდიმირ ზელენსკი

უკრაინა მზად არის მშვიდობისთვის. რუსეთმა უნდა აჩვენოს, მზად არის თუ არა ომის დასასრულებლად – თუ აპირებს მის გაგრძელებას, - ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.

“ჩვენს დელეგაციას სულ ახლახან ჰქონდა შეხვედრა ამერიკულ ჯგუფთან საუდის არაბეთში. განხილვა მთელი დღე გაგრძელდა და ეს იყო ნაყოფიერი შეხვედრა – კონსტრუქციული, ჩვენს გუნდებს შეეძლოთ მრავალი დეტალის განხილვა. ჩვენი პოზიცია სრულიად ნათელია: უკრაინა ომის პირველივე წამიდან ესწრაფვის მშვიდობას და გვინდა ყველაფერი გავაკეთოთ, რათა მშვიდობა რაც შეიძლება მალე და საიმედოდ დამყარდეს – ისე, რომ აღარ იყოს ომი.

ჩვენი, უკრაინის წინადადება ამერიკელებთან ამ შეხვედრაზე სამ ძირითად პუნქტს მოიცავდა: სიჩუმე ცაში – რაც გულისხმობს, რომ აღარ იქნებიან რაკეტები, ბომბები ან შორ მანძილზე მოქმედი დრონები; სიჩუმე ზღვაში; და რეალური ზომები ნდობის დასამყარებლად ამ სიტუაციაში, რომელშიც დიპლომატიური პროცესები მიმდინარეობს. ეს, პირველ რიგში, გულისხმობს ტყვეების გათავისუფლებას – ჩვენი სამხედროებისა და სამოქალაქო პირების, ასევე იმ უკრაინელი ბავშვების დაბრუნებას, რომლებიც რუსეთში არიან გადაყვანილნი.

ამერიკული მხარე ჩვენს არგუმენტებს აკვირდება და ჩვენს წინადადებებს განიხილავს. მსურს მადლობა გადავუხადო პრეზიდენტ ტრამპს ჩვენი გუნდების დიალოგის კონსტრუქციული ხასიათისთვის.

დღევანდელ შეხვედრაზე ამერიკული მხარისგან წამოვიდა წინადადება, რომ ამ შეთანხმებებს მიღმა გადაიდგას პირველი ნაბიჯი – დაუყოვნებლივ გამოცხადდეს 30-დღიანი სრული შეწყვეტა საბრძოლო მოქმედებების, რომელიც მოიცავს არა მხოლოდ რაკეტებს, დრონებსა და ბომბებს, არა მხოლოდ შავ ზღვას, არამედ მთელ ფრონტის ხაზს.

უკრაინა ამ წინადადებას იღებს, ჩვენ ამას პოზიტიურად ვაფასებთ და მზად ვართ ამ ნაბიჯის გადასადგმელად. ახლა აშშ-ს მოუწევს რუსეთი დაარწმუნოს, რომ ეს გადაწყვეტილება მიიღოს. ანუ ჩვენ ვთანხმდებით, და თუ რუსეთიც დაეთანხმება, მაშინ სიჩუმე ამოქმედდება იმავე მომენტში.

დღევანდელი განხილვების მნიშვნელოვანი ელემენტია ამერიკის მზადყოფნა, აღადგინოს თავდაცვითი დახმარება უკრაინისთვის და დაზვერვითი მხარდაჭერა.

როდესაც შეთანხმებები ძალაში შევა, ამ ოცდაათი დღის სიჩუმის პერიოდში ჩვენ და ჩვენს პარტნიორებს საკმარისი დრო გვექნება, რომ დავამუშავოთ ყველა საჭირო დოკუმენტი, რომელიც უზრუნველყოფს საიმედო მშვიდობასა და უსაფრთხოების მყარ გარანტიებს.

უკრაინა მზად არის მშვიდობისთვის. რუსეთმა უნდა აჩვენოს, მზად არის თუ არა ომის დასასრულებლად – თუ აპირებს მის გაგრძელებას.

დადგა დრო, სიმართლე გაირკვეს.

მადლობას ვუხდი ჩვენს დიპლომატებსა და ჩვენს გუნდს საუდის არაბეთში. მადლობას ვუხდი ყველას, ვინც ეხმარება უკრაინას. მადლობას ვუხდი თითოეულ ადამიანს, ვინც იბრძვის და მუშაობს ჩვენი ქვეყნისა და ჩვენი ხალხის კეთილდღეობისთვის.

ჩვენ მტკიცედ ვიცავთ დამოუკიდებლობას. ჩვენ მტკიცედ ვიცავთ ჩვენი ხალხის სიცოცხლეს.

და, რა თქმა უნდა, მადლობას ვუხდით ყველას, ვინც ეხმარება უკრაინას გადარჩეს და განვითარდეს – მიუხედავად ყველაფრის.

მშვიდობა უნდა იყოს ღირსეული,” - განაცხადა ზელენსკიმ.