კომენტარი

უბრალო მოწოდებებით საკითხები არ გადაწყდება, პრეზიდენტის მხრიდან ველით მეტ თანმიმდევრულობას, სიმტკიცეს - გიგა ბოკერია

ნაციონალური მოძრაობის წევრი გიგა ბოკერია იმედოვნებს, რომ საქართველოს პრეზიდენტი მნიშვნელოვანი საკითხების გადაწყვეტისას გაცილებით თანმიმდევრული და მტკიცე იქნება, ვიდრე ეს აქამდე იყო.

ამის შესახებ ბოკერიამ ჟურნალისტებს, მეცხრე მოწვევის პარლამენტის პირველ სესიაზე პრეზიდენტის გამოსვლის კომენტირებისას განაცხადა.

ამასთან, ბოკერიამ იმედი გამოთქვა, რომ ახალი მოწვევის პარლამენტი, დაგროვილი გამოცდილების გამო, შესაძლოა პრეზიდენტთან კონსტრუქციულად ითანამშრომლებს.

„პრეზიდენტთან თანამშრომლობის კუთხით, შეიძლება რაღაც გამოცდილება დაგროვდა ივანიშვილის გარემოცვაშიც, რომ ისეთი ველური მეთოდით არ უნდა იმოქმედონ, ზოგადად, ინსტიტუტების წინააღმდეგ, ამ შემთხვევაში პრეზიდენტის წინააღმდეგ. ამავე დროს, მათი წინასაარჩევნო განცხადებები და ზოგადად პერსონალურად ივანიშვილის ბუნება, არანაირი ოპტიმიზმის საფუძველს არ ტოვებს“,-აღნიშნა დეპუტატმა.

მისი თქმით, გიორგი მარგველაშვილმა საკუთარ სიტყვაში ახსენა ნაწილი იმ უზარმაზარი გამოწვევებისა, რომელიც საქართველოს წინაშე დგას და იმ პრობლემებისა, რომლებსაც უფრსკრულის პირას მივყავართ.

„ამ პრობლემების შექმნაში დიდი წვლილი მიუძღვის თვითონ ამ გუნდს. უბრალოდ მოწოდებებით პოლიტიკური საკითხები არ გადაწყდება. პრეზიდენტის მხრიდან ჩვენ ველით უფრო მეტ თანმიმდევრულობას, სიმტკიცეს მინიმუმ, რბილად რომ ვთქვა, მთელი პატივისცემით ინსტიტუტის მიმართ, როდესაც საქმე შეეხება მნიშვნელოვან საკითხებს, რომელსაც აქამდე ასეთი თანმიმდევრულობას ადგილი არ ქონია“,-განაცხადა გიგა ბოკერიამ.

მონიკა დავლიანიძე