მსოფლიო

„უარყავი სერჟი“ - ერევანში მასშტაბური საპროტესტი აქცია მიმდინარეობს

დღეს დილიდან ერევანში გრძელდება ოპოზიციის დაუმორჩილებლობის აქციები სახელწოდებით „უარყავი სერჟი“, რომლებიც თითქმის ერთი კვირა გრძელდება.

პარტია „სამოქალაქო შეთანხმების“ საბჭოს წევრმა, ნიკოლ პაშინიანმა მხარდამჭერებთან ერთად ერევანში ერთ-ერთი მთავარი, ბაგრამიანის პროსპექტი გადაკეტა, რომელთანაც მდებარეობს სომხეთის ეროვნული კრების შენობა (პარლამენტი). აქციის მიზანია, ხვალ პარლამენტში დეპუტატებმა ვერ შეაღწიონ, რათა მათ ვერ აირჩიონ პრემიერ-მინისტრად ქვეყნის ყოფილი პრეზიდენტი სერჟ სარგსიანი.

საპროტესტო მოძრაობის მონაწილეები ქვეყანაში ცვლილებებსა და სარგსიანის კლანის ჩამოშორებას ითხოვენ. აქტივისტთა თქმით, მათ სარგსიანის ხელისუფლებაში დარჩენა არ სურთ.

ადგილზე პოლიციაა მობილიზებული და არავის არ ატარებს.

აქციას შეუერთდნენ სტუდენტები, ვრცელდება ინფორმაცია აქციის მონაწილეებსა და პოლიციას შორის მომხდარ შეტაკებებზე.

ოპოზიციის ლიდერის, ნიკოლ პაშინიანის თქმით, საჭიროების შემთხვევაში ისინი დეპუტატების სახლებს პრემიერის არჩევის დღეს ალყას შემორტყამენ და სახლიდან გასვლის უფლებას არ მისცემენ.

მან აღნიშნა, რომ სარგსიანი ქვეყნის უსაფრთხოების თვალსაზრისით ყველაზე წარუმატებელი ლიდერი აღმოჩნდა დამოუკიდებელი სომხეთის ისტორიაში, რამდენადაც მისი პრეზიდენტობის დროს სომხეთმა 2016 წლის აპრილში ტერიტორიები და მოქალაქეები დაკარგა. პაშინიანმა ასევე ყველა ოპონენტს სერჟ სარგსიანის წინააღმდეგ გართიანებისკენ და ერთობლივი ბრძოლისკენ მოუწოდა.

სარგსიანის საპრეზიდენტო უფლებამოსილების ვადა 2018 წლის 9 აპრილს ამოიწურა. ამჟამად ის წარდგენილია პრემიერ-მინისტრობის კანდიდატად. მისი არჩევის შემთხვევაში, ის მთავრობას უხელმძღვანელებს 2022 წლამდე. მომიტინგეთა აზრით, საკონსტიტუციო ცვლილებები სარგსიანის ხელისუფლებაში დარჩენას ემსახურებოდა.