მსოფლიო

თურქეთში ტერორისტებთან შესაძლო თანამშრომლობის ბრალდებით გერმანული Die Welt-ის ჟურნალისტი დააკავეს

თურქეთში ტერორისტებთან შესაძლო თანამშრომლობის ბრალდებით გერმანული ყოველდღიური გაზეთ Die Welt- ის ჟურნალისტი დენიზ იუსელი დააკავეს.

როგორც გამოცემა იუწყება, იუსელს ბრალს დებენ მემარცხენე ჰაკერულ ორგანიზაცია RedHack-თან თანამშრომლობას, რომელიც, თურქეთის ხელისუფლებამ ტერორისტული დაჯგუფების სტატუსი მისცა იმის გამო, რომ RedHack-მა გატეხა და WikiLeaks-ზე გაავრცელა თურქეთის ენერგეტიკის მინისტრის, ბერატ აილბაირაკისა და რეჯიფ ტაიფ ერდოღანის სიძის საფოსტო მიმოწერა. მიმოწერაში საუბარი იყო თურქულ მედიაკომპანიებზე კონტროლსა და საზოგადოებრივი აზრის ფრომირებაზე ყალბი ტვიტერების მეშვეობით.

გარდა ამისა, თურქეთის პოლიცია იუსელს ადანაშაულებს ტერორიზმის პროპაგანდასა და ინფორმაციის არაკანონიერ გამოყენებაში.

Die Welt-ის მთავარი რედაქტორი ულფ პოშარდტი იმედოვნებს, რომ „სამართლიანი გამოძიება დაადასტურებს იუსელის უდანაშაულობას“.

გერმანიის საგარეო საქმეთა მინისტრმა ზიგმარ გაბრიელმა სპეციალური განცხადება გაავრცელა იუსელის დაკავების გამო.

„ვიმედოვნებთ, რომ თურქეთის ხელისუფლების მიერ მიმდინარე გამოძიება ბატონი იუსელის შესახებ კანონის სრული დაცვით განხორციელდება და სრული პატივისცემით პრესის თავისუფლების მიმართ, რომელიც გარანტირებულია თურქეთის კონსტიტუციით“,- წერია მინისტრის განცხადებაში.

ზიგმარ გაბრიელის განცხადებით, „გერმანია ყველაფერს აკეთებს დენიზ იუსელის მხარდასაჭერად“.

არასამთავრობო ორგანიზაცია „ჟურნალისტთა დამცველი კომიტეტის“ მონაცემებით, წინა წელს თურქეთში 81 ჟურნალისტი დააპატიმრეს. ორგანიზაციის განცხადებით, მათი უმრავლესობა 15 ივლისის ჩაშლილი სამხედრო გადატრიალების შემდეგ მოხდა.

ანა მებურიშვილი