მსოფლიო

თურქეთში რეფერენდუმის შედეგებს აქციებით აპროტესტებენ

თურქეთში ჩატარებული რეფერენდუმის შედეგებს აქციებით აპროტესტებენ.

გვიან ღამით, სტამბოლის ქუჩებში ასეულობით ადამიანი გამოვიდა.

გავრცელებული ინფორმაციით, დაახლოებით ათასი დემონსტრანტი ქალაქის ევროპულ ნაწილში, ბეშიკტაშის რაიონში შეიკრიბა, სტამბოლის აზიურ ნაწილში კი, 2 ათასი ადამიანი გამოვიდა.

აქცია-მსვლელობა ქვეყნის უმაღლესი საარჩევნო საბჭოსკენ გაიმართა, დემონსტრანტებს ხელში ეჭირათ ლოზუნგი „ჩვენ მხარდამხარ ვიბრძოლებთ ფაშიზმის წინააღმდეგ“.

აქციები სტამბოლის გარდა, თურქეთის სხვა ქალაქებშიც გაიმართა. ანტალიაში 13 ადამიანი დააკავეს.

თურქეთის ოპოზიცია რეფერენდუმის შედეგების გაუქმებას ითხოვს და კენჭისყრის დროს დაშვებულ დარღვევებზე მიუთითებს. კერძოდ, საუბარია იმაზე, რომ თურქეთის საარჩევნო კომისიამ მილიონზე მეტი ბიულეტენი ჩათვალა, რომელსაც შესაბამისი ბეჭედი აკლდა.

თავად ქვეყნის პრეზიდენტი დარღვევებს უარყოფს.

ეუთოში განაცხადეს, რომ რეფერენდუმი ევროპის საბჭოს სტანდარტებს არ შეესაბამებოდა.

რეფერენდუმი საკონსტიტუციო ცვლილებების შესახებ, თურქეთში 16 აპრილს გაიმართა. მოსახლეობის 51%-მა მხარი პრეზიდენტის უფლებამოსილების გაძლიერებას დაუჭირა.

მონიკა დავლიანიძე