მსოფლიო

თურქეთში 37 ადამიანი სოციალურ ქსელში გამოქვეყნებული პოსტების გამო დააკავეს

თურქეთის ხელისუფლებამ 37 ადამიანი დააკავა, რომლებიც სტამბოლის მერის, ეკრემ იმამოღლუს დაკავებასთან დაკავშირებით "პროვოკაციული" შინაარსის პოსტებს აქვეყნებდნენ, განაცხადეს მთავრობის წარმომადგენლებმა.

იმამოღლუ, რომელიც პრეზიდენტი რეჯეფ თაიფ ერდოღანის მთავარი პოლიტიკური ოპონენტია, ოთხშაბათს დააკავეს კორუფციასა და ტერორისტული დაჯგუფების მხარდაჭერაში ბრალდებით. ოპოზიციურმა პარტიამ ეს გადაწყვეტილება დაგმო და მას "მომავალი პრეზიდენტის წინააღმდეგ მოწყობილი გადატრიალების მცდელობა" უწოდა.

ათასობით დემონსტრანტი გამოვიდა ქუჩებში სტამბოლსა და ანკარაში, უნივერსიტეტების კამპუსებში კი ანტისამთვრობო საპროტესტო აქციები გაიმართა, მიუხედავად ოთხდღიანი აკრძალვისა, რომელიც ხელისუფლებამ იმამოღლუს დაკავების შემდეგ დააწესა.

თურქეთის შს მინისტრმა, ალი ერლიქაიამ, X-ზე დაწერა, რომ იმამოღლუსა და კიდევ 105 პირის დაკავების შემდეგ, სამართალდამცველებმა 261 სოციალური ქსელის ანგარიში გამოავლინეს, მათ შორის 62 საზღვარგარეთიდან, რომლებიც "დანაშაულისა და სიძულვილისკენ პროვოცირებას" უწყობდნენ ხელს. დანარჩენი ეჭვმიტანილების დადგენა გრძელდება.

მინისტრის თქმით, იმამოღლუს დაკავებიდან 24 საათში X-ზე მის შესახებ 18.6 მილიონი პოსტი გავრცელდა. 54 წლის პოპულარული პოლიტიკოსი ერდოღანს გარკვეულ საზოგადოებრივ გამოკითხვებში უსწრებს.

დემონსტრაციების აკრძალვასთან ერთად, ხელისუფლებამ ქალაქის რამდენიმე გზა დახურა და სოციალური ქსელების წვდომაც შეზღუდა.

პროკურატურის ინფორმაციით, სასამართლომ იმამოღლუს სამშენებლო, სავაჭრო და სამრეწველო კომპანიის მართვა ფინანსური დანაშაულის გამოძიების საფუძველზე აიღო.

"ხალხი კვლავ გასცემს პასუხს. როგორც გუშინ ვნახეთ, ყველა ქუჩაშია, ყველა მოედანზეა. მოედნები და საარჩევნო ყუთები ამ ყველაფრის პასუხი იქნება. მართალი გაიმარჯვებს", - განაცხადა სტამბოლში მცხოვრებმა იმამოღლუს მხარდამჭერმა, 34 წლის იუსუფ დემირჯიმ.