მსოფლიო

თურქეთსა და ამერიკას შორის სავიზო კრიზისი სამხედრო ოპერაციებზე გავლენას არ ახდენს - პენტაგონი

პენტაგონის პრეს-სპიკერის, პოლკოვნიკ რობერტ მენინგის განცხადებით, თურქეთსა და ამერიკას შორის შექმნილი სავიზო კრიზისი ერთობლივ სამხედრო ოპერაციებზე გავლენას არ იქონიებს.

ამის შესახებ მენინგმა პენტაგონში გამართულ პრესკონფერენციაზე განაცხადა.

„თურქეთი ჩვენი ძლიერი პარტნიორი და ნატო-ს უახლოესი მოკავშირეა. ვადასტურებთ, რომ აღნიშნული მოვლენები ჩვენს ერთობლივ ოპერაციებზე გავლენას არ იქონიებს“,-აღნიშნა მენინგმა.

მისი თქმით, ინჯირლიკის სამხედრო ბაზაზე დისლოცირებული თურქული სამხედრო საჰაერო ძალების ელემენტები ნატო-სა და კოლიაციაში მნიშვნელოვანი როლის შესრულებას განაგრძობენ.

„ჩვენი ოპერაციები „დაეშის“ წინააღმდეგ, რომელიც ინჯირლიკიდან და თურქეთის სხვა ბაზებიდან იმართება, გრძელდება მჭიდრო კოორდინაციაში. ჩვენი ერთობლივი და ცალკეული ოპერაციები მომავალშიც მჭიდრო კოორდინაციაში გაგრძელდება“,-განმარტა პოლკოვნიკმა.

ამერიკასა და თურქეთს შორის დიპლომატიური კრიზისი უკავშირდება სტამბოლში მდებარე ამერიკის საკონსულოს თანამშრომლის დაკავებას, რომელსაც თურქეთი 2016 წლის არშემდგარი სამხედრო გადატრიალების მონაწილეობაში ადანაშაულებს.

მონიკა დავლიანიძე