მსოფლიო

თურქეთის სასამართლომ 2016 წლის ამბოხებისთვის 104 ყოფილ სამხედროს სამუდამო პატიმრობა მიუსაჯა

თურქეთის სასამართლომ 104 ყოფილ სამხედროს 2016 წლის გადატრიალებაში მონაწილეობის გამო სამუდამო პატიმრობა მიუსაჯა. ამის შესახებ ბიბისი ადგილობრივ მედიაზე დაყრდნობით წერს.

იზმირის სასამართლომ 280 ყოფილი სამხედროს საქმე განიხილა. სასამართლომ 21 ადამიანს 20-წლიანი პატიმრობა მიუსაჯა „პრეზიდენტის მკვლელობის თანამონაწილეობისთვის“, ხოლო 31 ადამიანს 7-დან 11 წლამდე პატიმრობა მიუსაჯა „ტერორისტულ ორგანიზაციაში წევრობისთვის“.

თურქეთის პრეზიდენტის, რეჯეფ ტაიფ ერდოღანის ჩამოგდების მიზნით მეამბოხეთა ჯგუფმა გადატრიალება მოაწყო 2016 წლის 15 ივლისს, რომლის შედეგად დაიღუპა სულ მცირე 260 ადამიანი, ხოლო დაშავდა 2200 ადამიანი. თურქეთის მთავრობამ ამბოხება ჩაახშო და ამის შემდგომ ამბოხების სავარაუდო მხარდაჭერის ბრალდებით 150 000-ზე მეტი სახელმწიფო მოსამსახურე გაათავისუფლეს, ხოლო დაახლოებით 50 000 ადამიანი დააკავეს.