მსოფლიო

თურქეთის პროკურატურამ 243 სამხედროს დაკავების ორდერი გასცა

თურქეთის პროკურატურამ თურქეთის შეიარაღებული ძალების 243 სამხედროს დაკავების ორდერი გასცა ქვეყნის 54 პროვინციაში.

სახელმწიფო საინფორმაციო სააგენტო Anadolu-ის თქმით, მასშტაბური დაკავებები ივლისის “არშემდგარი“ გადატრიალების გამოძიების ფარგლებში მიმდინარეობს.

ოთხშაბათს Anadolu-მ, პროკურატურაზე დაყრდნობით, გაავრცელა ცნობა, რომ ეჭვმიტანილები სავარუდოდ იყენებდნენ მობილურ აპლიკაცია Bylock-ს. თურქული ხელისუფლების თქმით, ამ პროგრამას ამერიკაში გადახვეწილი სასულიერო პირის, ფეთჰულა გიულენის მხარდამჭერები იყენებენ დაშიფრული მესიჯების გასაგზავნად.

Anadolu-ის ინფორმაციით, “არშემდგარი“ გადატრიალების შემდეგ ოფიციალურად 37 000 ადამიანზე მეტი იყო დაკავებული, 100 000-მდე სახელმწიფო მოხელე სამსახურებიდან დაითხოვეს.

ანკარამ გადატრიალებაში ფეთჰულა გიულენი დაადანაშაულა. თურქეთის მთავრობა ამ დრომდე ითხოვს აშშ-ისგან გიულენის ეკსტრადირებას.

2016 წლის 16 ივლისს თურქეთში სამხედრო გადატრიალების მცდელობა იყო. შეტაკებები სტამბოლსა და ანკარაში მოხდა, რასაც 240 ადამიანის დაღუპვა მოჰყვა, 2000-ზე მეტი კი დაშავდა.

ანა მებურიშვილი