მსოფლიო

თურქეთის პრეზიდენტმა ქურთი მებრძოლეების წინააღმდეგ ახალი სამხედრო ოპერაციების დაწყების პირობა დადო

თურქეთის პრეზიდენტმა რეჯეფ ტაიფ ერდოღანმა პირობა დადო, რომ სირიასთან და ერაყთან საზღვრისპირა ტერიტორიებზე ქურთი მებრძოლეების წინააღმდეგ ახალ სამხედრო ოპერაციებს დაიწყებს. ამის შესახებ ერდოღანმა გუშინ სტამბოლში, ამომრჩევლებთან შეხვედრისას განაცხადა, სადაც თურქეთის პრეზიდენტმა შეკრებილებს საკუთარი გეგმები გააცნო.

თურქეთის პრეზიდენტის თქმით, ოპერაციები იქამდე გაგრძელდება, სანამ ერთი ტერორისტი დარჩება.

ამომრჩევლის წინაშე გამოსვლისას ერდოღანმა თქვა, რომ ივნისში გასამართი რიგგარეშე საპრეზიდენტო და საპარლამენტო არჩევნები ქვაკუთხედია ძლიერი თურქეთისთვის.

ერდოღანმა აღნიშნა, რომ თურქეთი „გლობალურ ძალად“ უნდა წარდგეს.

თურქეთში რიგგარეშე საპარლამენტო და საპრეზიდენტო არჩევნები 2019 წლის ნოემბრის მაგივრად 2018 წლის 24 ივნისს გაიმართება.

არჩევნების შედეგად ძალაში შევა თურქეთის კონსტიტუციაში შეტანილი ცვლილებები, რომლებიც მიიღეს 2017 წლის 16 აპრილის რეფერენდუმზე. კერძოდ, დეპუტატთა რაოდენობა 550-დან 600-მდე გაიზრდება, გაუქმდება თურქეთის პრემიერ-მინისტრის თანამდებობა, ხოლო პრეზიდენტი აღმასრულებელ ხელისუფლებას უხელმძღვანელებს. გარდა ამისა, პარლამენტი დაკარგავს კონტროლს მთავრობის საქმიანობაზე.

ოპოზიციური ძალების თქმით, ეს ცვლილებები ქმნის ერთპიროვნული მმართველობის სისტემას. ისინი პირდებიან, რომ მათი არჩევის შემთხვევაში ქვეყანა საპარლამენტო მმართველობის მოდელს დაუბრუნდება.