მსოფლიო

თურქეთის პრეზიდენტის განცხადება „გაუმართლებელია“ - ანგელა მერკელი

გერმანიის კანცლერი ანგელა მერკელი ბუნდესტაგში, თურქეთის პრეზიდენტის განცხადებას გამოეხმაურა, რომლის მიხედვით, გერმანია „ნაცისტურ პრაქტიკას“ იყენებს.

ანგელა მერკელის თქმით, ეს განცხადება „გაუმართლებელია“.

მისივე განცხადებით, ორ ქვეყანას შორის „ღრმა განსხვავებები“ წარმოიშვა, რომლის აღმოსაფხვრელადაც დიდი ძალისხმევაა საჭირო.

მერკელის თქმით, ერდოღანის განცხადება „ძალიან სამწუხარო და უადგილოა“ და მას „არავითარი გამართლება არ აქვს.“

მერკელმა გერმანულ-თურქულ ურთიერთობებზე მუშაობის პირობა დადო, „თუმცა გერმანიის ღირებულებებისა და ფასეულობების საფუძველზე.“

შეგახსენებთ, თურქეთის პრეზიდენტმა რეჯეპ ტაიპ ერდოღანმა გერმანია „ნაცისტურ ქმედებებში“ დაადანაშაულა, მას შემდეგ რაც ადგილობრივმა ხელისუფლებამ თურქ მინისტრებს აქციის ჩატარებაზე უარი განუცხადა.

ანკარაში, „დოიჩე ველეს“ ჟურნალისტის დაკავების გამო აღშფოთების ზრდის ფონზე, გასულ კვირას, გერმანიის ხელისუფლებამ თურქულ დიასპორას ორი აქციის ჩატარების ნება არ დართო.

მონიკა დავლიანიძე