მსოფლიო

თურქეთი და აზერბაიჯანი საკუთარი მიზნებისთვის საქართველოს გამოყენებას ცდილობენ- სომხეთის ექს-თავდაცვის მინისტრი

სომხეთის თავდაცვის ყოფილი მინისტრის, ვაგარშაკ არუთუნიანის განცხადებით, თურქეთი და აზერბაიჯანი ცდილობენ საქართველო საკუთარი მიზნებისთვის გამოიყენონ.

ამის შესახებ არუთუნიანმა საქართველოში ჩატარებული სწავლება „კავკასიური არწივი-2017“-ის კომენტირებისას აღნიშნა, რომელშიც მონაწილეობას საქართველოს, თურქეთისა და აზერბაიჯანის სპეციალური დანაყოფები ღებულობდნენ.

„სწავლების მთავარი მიზანი - რაღაც საშიშროების ნეიტრალიზაციაა. თუკი ჩვენ ამ კავშირს შევაფასებთ, მნიშვნელოვანია გააზრება, თუ ვის წინააღმდეგ არის ეს მიმართული და რა საშიშროების არსებობის შემთხვევაში უნდა შეასრულონ დანაყოფებმა საკუთარი ამოცანები. ცხადზე ცხადია, რომ თურქეთი და აზერბაიჯანი ცდილობენ საქართველო ჩაითრიონ ერთ ფორმატში, რომელიც მათი ამოცანების მოგვარებას გულისხმობს“,-აღნიშნა არუთუნიანმა Sputnik-Армениа-თან საუბარში.

მისი თქმით, „აზერბაიჯანს საქართველოს განეიტრალება ყარაბახის საკითხის მოგვარებისთვის სურს, ანუ ჩაითრიოს ის ყარაბაღის პრობლემის მოგვარებაში. თურქეთიც საქართველოს საკუთარი მიზნებისთვის გამოყენებას ცდილობს“.

„ერთის მხრივ თურქეთი, რომელიც ნატოს წევრი ქვეყანაა, საქართველოს სწრაფვას გახდეს ალიანსის წევრი მხარს უჭერს. მეორეს მხრივ, თურქეთს საქართველო და ზოგადად, სამხრივი კავშირი იმისთვის სჭირდება, რომ რეგიონში საკუთარ მნიშვნელობას გაუსვას ხაზი, იმ ფონეზე, როდესაც მას ჩრდილოატლანტიკური ალიანსის წევრებთან ურთიერთობა აქვს გაფუჭებული. თუმცა, როგორც ჩანს, მეზობლების გეგმებს საქართველო არ იზიარებს, რადგან მას არ სურს სომხეთთან ურთიერთობის გაფუჭება, მას არ უნდა მეზობელთან დაძაბულობა და დაბალანსებულ პოლიტიკას აწარმოებს“,-მიიჩნევს სომხეთის ექს-თავდაცვის მინისტრი.

მონიკა დავლიანიძე