კომენტარი

თუკი მოქალაქე 90-დღიანი ვადის გასვლის შემდეგ საქართველოში არ დაბრუნდება, მის მონაცემებს შსს ევროკავშირის შესაბამის სტრუქტურებს გადაუგზავნის - შალვა ხუციშვილი

შს მინისტრის მოადგილის, შალვა ხუციშვილის განცხადებით, უწყებას აქვს სპეციალური პროგრამა, რომლითაც აწარმოებს სტატისტიკას საქართველოდან გასული პირებისა და თუკი მოქალაქე 90-დღიანი ვადის გასვლის შემდეგ ქვეყანაში არ დაბრუნდება, მის მონაცემებს შს სამინისტრო ევროკავშირის შესაბამის სტრუქტურებს გადაუგზავნის.

შესაბამისი განცხადება შალვა ხუციშვილმა იმ ტექნიკური საშუალებების პრეზენტაციაზე გააკეთა, რომლითაც ძალოვანი უწყება ევროკავშირთან უვიზო რეჟიმის პროცესის მიმდინარეობას მონიტორინგს გაუწევს.

„ჩვენ უკვე გვაქვს ტექნიკური საშუალებები, რათა გამოვავლინოთ ის მოქალაქეები, რომლებიც ევროკავშირის ქვეყნებში ყოფნის ვადას გადააჭარბებენ და სხვა მხრივ დაარღვევენ უვიზო მიმოსვლის პირობებს და ამის შესახებ უფრო აქტიურად მივაწოდოთ ინფორმაცია ევროკავშირის შესაბამის სტრუქტურებსა და ჩვენს კოლეგებს სხვადასხვა ქვეყანაში. არასრულწლოვნებთან დაკავშირებით რჩება იგივე რეჟიმი, რაც დღეს მოქმედებს ანუ საჭიროა მშობლების თანხმობა, ან ბავშვი უნდა მიდიოდეს მშობლების თანხლებით. რაც შეეხება ნასამართლევ პირებს, თუ ვინმე საქართველოშია ნასამართლევი და სახელმწიფოს წინაშე აქვს ვალდებულება, მაგალითად, არის პრობაციონერი, ან რაიმე სხვა უფლება აქვს შეზღდული, მას ქვეყნიდან გასვლა არ შეეძლება. სხვა შემთხვევაში კი ნასამართლევ პირებსაც თავისუფლად შეუძლიათ შევიდნენ ევროკავშირის ტერიტორიაზე თუ დააკმაყოფილებენ იმ პირობებს, რაც დადგენილია შენგენის ზონისთვის“, - განმარტა შალვა ხუციშვილმა.

ნინო ექვთიმიშვილი