კომენტარი

თუკი დეპუტატის უფლებები შეიზღუდა რეაგირება გვექნება - ირაკლი კობახიძე

პარლამენტის თავმჯდომარე ირაკლი კობახიძე დაინტერესდება შეიზღუდა თუ არა, „ნაციონალური მოძრაობის“ აქციაზე დეპუტატების უფლებები და საჭიროების შემთხვევაში რეაგირებას მოახდენს.

ამასთან, როგორც კობახიძემ აღნიშნა, გუშინ მომხდარ ინციდენტზე დეტალები არ იცის.

„რაც შეეხება მერიაში შეშვების საქმეს, თუკი იყო საზოგადოებრივი წესრიგის დარღვევის საფრთხე, ეს შეიძლება შესაბამისი შეზღუდვის საფუძველი გამხდარიყო, თუმცა, დეტალები არ ვიცი. თუკი დეპუტატის უფლებები შეიზღუდა, ამით დავინტერესდები და საჭიროების შემთხვევაში რეაგირება გვექნება“,-აღნიშნა პარლამენტის თავმჯდომარემ.

„ნაციონალურმა მოძრაობამ“ გუშინ, თბილისის მერიასთან საპროტესტო აქცია გამართა, რომლის დროს აქციის მონაწილეებსა და სამართალდამცავებს შორის შეხლა-შემოხლა მოხდა.

საპატრულო პოლიციამ ექვსი პირი დააკავა.

„ნაციონალური მოძრაობა“ თბილისის საკრებულოს მიერ 29 სექტემებერს მიღებულ გადაწყვეტილებას აპროტესტებდა,რომლის მიხედვით, სოლოლაკის ქედისა და თავისუფლების მოედნის მახლობლად მდებარე მიწის ნაკვეთისათვის ლანდშაფტური ზონის სტატუსის შეცვლა მოხდა.

მონიკა დავლიანიძე