მსოფლიო

თუ რუსეთთან ურთიერთობას ვერ დავალაგებ, პუტინის ყველაზე საშინელი მტერი ვიქნები - დონალდ ტრამპი

აშშ-ის პრეზიდენტი, დონალდ ტრამპი დაპირდა, რომ თუ რუსეთთან ის ურთიერთობებს ვერ მოაგვარებს, ის ვლადიმერ პუტინის „ყველაზე საშინელი მტერი“ გახდება. ამის შესახებ ტრამპმა ტელეარხ CNBC-სთან ინტერვიუში თქვა.

ტრამპის განცხადებით, მისი პოლიტიკა რუსეთის მიმართ მისი წინამორბედებისგან განსხვავებით ბევრად ხისტია.

„მე ვარ ბევრად ხისტი რუსეთთან მიმართებით ვიდრე ნებისმიერი პრეზიდენტი ბევრი წლის განმავლობაში, შესაძლოა, ყველაზე ხისტიც.

გაიხსენეთ სანქციები, რომლებიც რუსეთს დავუწესე, გაიხსენეთ დიპლომატები, რომლებიც გავაძევე, გაიხსენეთ ყველაფერი ის, რაც გავაკეთე. არავის ეს არ გაუკეთებია. ობამას არ გაუკეთებია. ობამა იყო დოყლაპია რუსეთისთვის“, - განაცხადა ტრამპმა.

აშშ-ის პრეზიდენტმა აღნიშნა, რომ აფასებს შესაძლებლობას, გააუმჯობესოს რუსეთთან ურთიერთობა მას შემდეგაც კი, რაც ამერიკის სადაზვერვო სააგენტოებმა განაცხადეს, რომ რუსეთმა ხელმეორედ სცადა ჩარევა 2016 წლის აშშ-ის საპრეზიდენტო არჩევნებში.

„კარგი ურთიერთობა პრეზიდენტ პუტინთან, რუსეთთან პოზიტიურია, არაა ნეგატიური“, - დასძინა ტრამპმა.

თუმცა იქვე აღნიშნა, რომ „თუ ეს არ იმუშავებს, თუ ურთიერთობებს ვერ დავალაგებთ, მაშინ მე მისი ყველაზე საშინელი მტერი ვიქნები“.

ცნობისთვის, თეთრი სახლის პრესმდივანმა სარა სანდერსმა საკუთარ ტვიტერზე დაწერა, რომ დონალდ ტრამპმა დაავალა თავის მრჩეველს ეროვნული უსაფრთხოების საკითხში, ჯონ ბოლტონს, დაპატიჟოს ვლადიმერ პუტინი ვაშინგტონში შემოდგომაზე.

ორშაბათს ფინეთის დედაქალაქ ჰელსინკიში ტრამპისა და პუტინის შეხვედრა გაიმართა.