კომენტარი

თუ პრეზიდენტი ივნისი-ივლისის თვეებში გადადგება, მას პრეზიდენტის არაპირდაპირი წესით არჩევა ვერ მოუსწრებს - კონსტიტუციონალისტი

კონსტიტუციონალისტმა ვახო ჟვანიამ კომენტარი გააკეთა საქართველოს პარლამენტის თავმჯდომარის, დავით უსუფაშვილის პროგნოზთან დაკავშირებით, რომ შესაძლოა, გიორგი მარგველაშვილი პრეზიდენტის თანამდებობიდან ვადამდე ადრე გადადგეს.

როგორც ჟვანია ამბობს, თუ პრეზიდენტი ამ ნაბიჯის გადადგმას გადაწყვეტს, მან ეს უნდა გააკეთოს სანამ საკონსტიტუციო ცვლილებები პარლამნეტში მეორე მოსმენით გავა.

„თუ პრეზიდენტი დაახლოებით ივნისი-ივლისის თვეებში გადადგება, ეს ავტომატურად ნიშნავს იმას, რომ მას ახალი საკონსტიტუციო რეფორმა, ანუ თუნდაც პრეზიდენტის არაპირდაპირი წესით არჩევა ვერ მოუსწრებს და საპრეზიდენტო არჩევნები ისევ პირდაპირი წესით ჩატარდება.

აქ უკვე ისმის მეორე მნიშვნელოვანი კითხვა, რამდენად არის შესაძლებელი ვთქვათ ავირჩიოთ ახალი პრეზიდენტი პირდაპირი არჩევნების გზით და უკვე ამ კონსტიტუციური პროექტის გარდამავალ დებულებებში ჩაიწეროს ის, რომ პირდაპირი წესით არჩეულ პრეზიდენტს უწყდება უფლებამოსილება და შემდგომი ახალი პრეზიდენტი უკვე პარლამენტმა აირჩიოს.

შემიძლია თამამად ვთქვა, რომ ეს შეუძლებელია, იმიტომ, რომ მოქალაქეები კონკრეტულ ადამიანს, კანდიდატს აძლევენ კონკრეტული უფლებამოსილებებით ხმას და აქედან გამომდინარე ძალიან ბევრ კითხვის ნიშანს დაბადებს და არ იქნება კონსტიტუციონალიზმის პრინციპებიდან გამომდინარე’’, - აცხადებს ვახო ჟვანია.

ნინო ექვთიმიშვილი