კომენტარი

თუ მიხეილ სააკაშვილის ექსტრადიცია მოხდა, ეს ქართულ პოლიტიკაში ახალი რეალობის დაწყების მიზეზი გახდება - ხატია დეკანოიძე

„ნაციონალური მოძრაობის“ წევრის, ხატია დეკანოიძის შეფასებით, იმ შემთხვევაში თუ საქართველოში მიხეილ სააკაშვილის ექსტრადიცია მოხდა, ეს ქართულ პოლიტიკაში ახალი რეალობის დაწყების მიზეზი გახდება.

ამასთან, დეკანოიძე ვარაუდობს, რომ უკრაინის ხელისუფლება სააკაშვილის ექსტრადირებას იმ მიზეზით ვერ გაბედავს, რომ მას ქვეყანაში ხალხის ნდობა არ გააჩნია.

ამის შესახებ ხატია დეკანოიძემ სააკაშვილის მიერ გუშინ გაკეთებული განცხადების კომენტირებისას აღნიშნა.

„თუ გავითვალისწინებთ იმ მდგომარეობას, რომელიც დღეს არის უკრაინაში, ვგულისხმობ, ადამიანების დამოკიდებულებას ხელისუფლების მიმართ, სრულ უნდობლობას, გამიჭირდებოდა ვთქვა ის, რომ უკრაინის ხელისუფლებას ეყოფა გამბედაობა დააკავოს მიხეილ სააკაშვილი.

მაგრამ, ჩვენ ასევე უნდა გავითვალისწინოთ, რომ უკრაინაში ხელისუფლება არ არის დემოკრატიული. ეს არის ხელისუფლება, რომელიც, სამწუხაროდ, ოლიგარქიული თამაშის წესებით თამაშობს და სწორედ ამ თამაშის წესების გაგრძელება იყო უკრაინის პრეზიდენტის და ივანიშვილის მოლაპარაკება, რომელიც, სავარაუდოდ, გაგრძელდა კვირიკაშვილის და გროისმანის მოლაპარაკებით. თუმცა, ქართული მხარე დღემდე უმტკიცებდა უკრაინულ მხარეს, რომ რეალურად არ სურთ იხილონ მიხეილ სააკაშვილი საქართველოს ტერიტორიაზე.

თუ მაინც მოხდა ძალადობრივი დაკავება სააკაშვილის იმ ქართველების მსგავსად, რაც ჩვენ ვიხილეთ, რაც არღვევდა ადამიანის უფლებების ყველა კონვენციას, და მოხდა მისი გადმოცემა საქართველოში - ეს იქნება ახალი პოლიტიკური რეალობის დაწყება ჩვენი ქვეყნისთვის და ეს ქინება დასასრული იმ ოლიგარქიული რეჟიმისა, რომელიც სამწუხაროდ ჩვენს ქეყანაშიც არის და უკრაინაშიც“,-აღნიშნა დეკანოიძემ.

მონიკა დავლიანიძე