მსოფლიო

თუ კონკრეტულ ზომებს არ მივიღებთ, შესაძლოა, რუსეთმა ქიმიური იარაღი ნიუ-იორკში გამოიყენოს - ნიკი ჰეილი

“აშშ მიიჩნევს, რომ რუსეთია პასუხისმგებელი ორ ადამიანზე თავდასხმაში დიდ ბრიტანეთში, რომელშიც გამოყენებულია სამხედრო ნერვო-პარალეპტიკური ნივთიერება“,- ასე გამოეხმაურა აშშ-ის მუდმივი წარმომადგენელი გაეროში ნიკი ჰეილი რუსეთსა და დიდ ბრიტანეთს შორის შექმნილ დიპლომატიურ სკანდალს, რომელიც უკავშირდება ბრიტანეთის ტერიტორიაზე ქიმიურ თავდასხმას რუსეთის ყოფილ ორმაგ აგენტზე - სერგეი სკრიპალსა და მის ქალიშვილზე.

აშშ-ის წარმომადგენელმა მხარდაჭერა გამოუცხადა ლონდონის მიერ ამოქმედებულ მკაცრ ზომებს რუსეთის წინააღმდეგ.

ჰეილიმ არ გამორიცხა, რომ რუსეთმა მსგავსი ქიმიური თავდასხმა უკვე აშშ-ში განახორციელოს.

„თუკი კონკრეტულ სასწრაფო ზომებს არ მივიღებთ ამასთან დაკავშირებით, სოლსბერი არ იქნება ბოლო ადგილი, სადაც იქნება გამოყენებული ქიმიური იარაღი.

ეს შეიძლება იყოს გამოყენებული აქ, ნიუ-იორკში, ან იმ ქვეყნების ქალაქებში, ვინც საბჭოზე ზის [გაეროს უშიშროების საბჭო]. ეს განმსაზღვრელი მომენტია“, -აღნიშნაჰეილიმ.

მისივე თქმით, თუკი საბჭო რუსეთს პასუხისმგებლობისკენ არ მოუწოდებს, ორგანიზაციის ავტორიტეტი შეირყევა.

სერგეი სკრიპალი და მისი ქალიშვილი 4 მარტს მოწამლეს. გარდა ამისა დაშავდა 20-მდე სამოქალაქო პირი და პოლიციელი. როგორც დადგინდა, სკრიპალის მოსაწამლად რუსეთში გამზადებული ნერვო-პარალეპტიკური გაზი სახელწოდებით - ნოვიჩოკი გამოიყენეს.

12 მარტს დიდი ბრიტანეთის პრემიერ-მინისტრმა ტერეზა მეიმ რუსეთს 24-საათიანი ულტიმატუმი წაუყენა, რათა მოსკოვს პასუხი გაეცა, როგორ მოხვდა ეს ნივთიერება ბრიტანეთის ტერიტორიაზე.

რუსეთმა ამ ულტიმატუმზე არ უპასუხა. ამის შემდეგ მეიმ თემთა პალატაში გამართულ ყოველკვირეულ შეხვედრაზე განაცხადა, რომ ქვეყნიდან გააძევებენ 23 რუს დიპლომატს და დიდი ბრიტანეთის დასატოვებლად მათ ერთი კვირა აქვთ.

გარდა ამისა, ლონდონი მოსკოვთან ყველა დონის ურთიერთობას წყვეტს.