კომენტარი

თუ ხელისუფლებას უნდა მოსმენა, ის აუცილებლად მოისმენს ნებისმიერ ქვეყანაში - ალექსანდრე ქანთარია

თუნდაც ყველა დეპუტატს თავისი „გასაღები“ დაურიგონ, ვფიქრობ, თუ ხელისუფლებას უნდა მოსმენა, ის აუცილებლად მოისმენს ნებისმიერ ქვეყანაში, - განუცხადა ჟურნალისტებს საპარლამენტო უმრავლესობის წევრმა, ალექსანდრე ქანთარიამ ე.წ. ფარულ მოსმენებთან დაკავშირებულ საკანონმდებლო პაკეტზე საუბრისას.

„დღეს, როცა ასეთი მდგომარეობაა ტერორიზმთან დაკავშირებით, მსოფლიოში ალბათ, ყველა ამ მოსმენაზეა დამოკიდებული. აქ არის ნდობის საკითხი. თუ ხელისუფლებას ენდობი მაშინ, უნდა ენდო მის უსაფრთხოების სამსახურსაც. ხელისუფლებას ამომრჩეველი ენდობა, ეს დაამტკიცა არჩევნებზე.

ეს მანიპულაციები მგონია, რომ არ არის რეალობიდან გამომდინარე, რაიმე კონკრეტული შედეგის
მომტანი. არასამთავრობოების ვიწრო წრეს არჩეული აქვს ეს ნიშა და ცდილობს, რაღაც ხმაური შექმნას. მაინც არ კმაყოფილდებიან ამ ახალი კანონპროექტით იმიტომ, რომ საერთო ქოლგის ქვეშ იქმნება სააგენტო.

არ ვიცი, რამდენად მიიღებს ამას საკონსტიტუციო სასამართლო, ეს ცალკე საკითხია. ვფიქრობ, საზოგადოების ფართო ფენების ინტერესს ეს საკითხი არ წარმოადგენს. მე პირადად ვაცხადებ, მომისმინონ ნებისმიერ საათში, ნებისმიერ დღეს და იქნებ ზოგიერთი რამ გაითვალისწინონ. ჩვენი მთავარი მიზანია, მშვიდობიანი გარემო შევინარჩუნოთ უსაფრთხოების კუთხით“, - განაცხადა ალექსანდრე ქანთარიამ.

ნინო ექვთიმიშვილი