მსოფლიო

თუ გვინდა თავიდან ავიცილოთ მსოფლიოს დანაწევრება, ჩვენ გვჭირდება ძლიერი ევროპა - ემანუელ მაკრონი

საფრანგეთის პრეზიდენტი ემანუელ მაკრონი ევროკავშირის საერთაშორისო როლის გაძლიერებისთვის 10-წლიანი სტრატეგიის შემუშავების ინიციატივით გამოვიდა. ამის შესახებ მაკრონმა დავოსის საერთაშორისო ეკონომიკურ ფორუმზე განაცხადა, მან გლობალიზაციის კრიზისზე გაამახვილა ყურადღება.

„თუ გვინდა, თავიდან ავიცილოთ მსოფლიოს დანაწევრება, ჩვენ გვჭირდება ძლიერი ევროპა. ეს ძალიან მნიშვნელოვანია“, - აღნიშნა მაკრონმა.

საფრანგეთის პრეზიდენტმა რადიკალ-მემარჯვენეთა გაძლიერების საფრთხეზე ისაუბრა.

„თუკი გლობალიზაციის არსის არ მჯერა, თუკი ვერ მოვახერხებ ხალხისთვის თქმას, რომ გლობალიზაცია მათთვის კარგია, მაშინ 5,10,15 წლის შემდეგ მოიგებენ ნაციონალისტები, ექსტრემისტები“, - თქვა მაკრონმა.

მისივე თქმით, ევროპა აშშ-სა და ჩინეთის საპირწონედ უფრო ძლიერი როლი უნდა ითამაშოს საერთაშორისო არენაზე. მაკრონმა გამოჰყო ისეთი თემები, როგორიცაა საიმიგრაციო პოლიტიკა, ენერგეტიკა, თავდაცვა და ინვესტიციები. მან ასევე მხარი დაუჭირა კონცეფციას „სხვადასხვა სიჩქარეების ევროპები“, რომელიც გულისხმობს, რომ თუკი ევროკავშირის რომელიმე ქვეყანა უფრო სწრაფად ვითარდება, ორგანიზაციის სხვა წევრები ამას არ უნდა აფერხებდნენ.