კომენტარი

თუ გაქვს განსხვავებული მოსაზრებები, მაშინ უნდა დატოვო პარტია და უნდა იყო ოპოზიციაში - კახა კალაძე

როდესაც გამოდიხარ და პირად შეურაცხყოფას აყენებ ადამიანებს, მიუღებელია, - ასე გამოეხმაურა თბილისის მერი, პარტია „ქართული ოცნების“ გენერალური მდივანი, კახა კალაძე პარტიიდან დავით ჭიჭინაძის გარიცხვის საკითხს.

კალაძის თქმით, გუნდში ბევრჯერ ყოფილა მსჯელობა, კამათი, მაგრამ პირადი შეურაცხყოფის მიყენება ადამიანებზე არასწორია და მიუღებელი.

"ბევრი ინტერპრეტაცია მოვისმინე, რომელიც ნამდვილად არ შეესაბამება სიმართლეს. რა თქმა უნდა, როდესაც არის განსხვავებული აზრი, ამას მივესალმებით. გუნდში ბევრჯერ ყოფილა მსჯელობა, კამათი, გაცხარებულზე შეიძლება ერთმა მეორეს შეურაცხყოფა მიაყენოს, მაგრამ როდესაც გამოდიხარ და პირად შეურაცხყოფას აყენებ ადამიანებს, მგონია, რომ არასწორია და მიუღებელი. პირველ რიგში ჩვენ ვართ ადამიანები, მერე პოლიტიკოსები. თუ გაქვს განსხვავებული მოსაზრებები, მაშინ უნდა დატოვო პარტია და უნდა იყო ოპოზიციაში",- განაცხადა კალაძემ და აღნიშნა, რომ ეს არ არის პარტიის მხრიდან ვინმეს დევნა.

"განსხვავებული აზრის გამოხატვა ნებისმიერ ადამიანს შეუძლია, პარტია "ქართული ოცნება" არის ამის საუკეთესო მაგალითი. ბევრი განსხვავებული აზრი მოგვისმენია, რომელსაც, შესაძლოა, გუნდში ბევრი არ ეთანხმებოდა. გუნდში არსებობს ბევრი განსხვავებული აზრი. შესაძლოა, ბევრი რამ მეც არ მომწონს ან არ მომწონდა, მაგრამ ამაზე გუნდში ვსაუბრობთ და ვკამათობთ.

არცერთი გადაწყვეტილება არ მიღებულა არც პარტიაში და არც პარლამენტში, რომ არ ყოფილიყო მსჯელობა,"- განაცხადა კალაძემ.