კომენტარი

თუ არ მოგწონს, ესე იგი არ ვარგა, და თუ არ ვარგა, არ შეიძლება ხელმოწერილი იყოს პრეზიდენტის მხრიდან – გიორგი ახვლედიანი

„დემოკრატიული მოძრაობის“ წევრის გიორგი ახვლედიანის შეფასებით, პრეზიდენტმა კონსტიტუციის პროექტისთვის ხელისმოწერით გაუგებარი აქტი განახორციელა.

პოლიტიკოსის თქმით, თუ პრეზიდენტს არ მოსწონს კონსტიტუციის პროექტი, გაუგებარია რატომ მოაწერა მას ხელი.

„ხელი რომ არ მოეწერა ეს იქნებოდა ძალიან მართებული კონკრეტული აქტი პრეზიდენტის მხრიდან. ახლა კი მან განახორციელა სრულიად გაუგებარი აქტი. „არ მომწონს, მაგრამ ვაწერ“ – არის სრულიად გაუგებარი რამ. თუ არ მოგწონს, ესე იგი არ ვარგა და თქვი რომ არ ვარგა, და თუ არ ვარგა, არ შეიძლება ხელმოწერილი იყოს პრეზიდენტის მხრიდან და მისი პასუხისმგებლობა იყოს დაფიქსირებული მისი ხელმოწერით“,–აღნიშნა ახვლედიანმა.

საქართველოს პრეზიდენტმა საკონსტიტუციო ცვლილებებს ხელი მოაწერა.

გიორგი მარგველაშვილის განმარტებით, პარლამენტმა მიიღო ერთპარტიული კონსტიტუცია და მისთვის ძნელია ასეთ კონსტიტუციას ხელი მოაწეროს, თუმცა „მიუხედავად ამისა, ქვეყნის შიდა და გარე გამოწვევებიდან გამომდინარე, გამომდინარე იქიდან, რომ უნდა ყველანაირი ნაბიჯი გადავდგათ, რომ თავიდან აცილებული იყოს შესაძლო დესტაბილიზაციის მიზეზები, მე როგორც სახელმწიფო მეთაური სამხედრო ძალების უმაღლესი მთავარსარდალი და კონსტიტუციის გარანტი ხელს ვაწერ ამ დოკუმენტს“.

მონიკა დავლიანიძე