კომენტარი

თუ არ გამოფხიზლდა `ქართული ოცნება`, ეს არ იქნება დასასრული იუსტიციის საბჭოს თავხედობის - ანა დოლიძე

ვუსამძიმრებ ჩვენს მოსახლეობას, რომ დღეს იუსტიციის საბჭომ მიიღო ეს გადაწყვეტილება და მურუსიძე უვადო მოსამართლედ განწესდა, - ასე აფასებს იუსტიციის საბჭოს არამოსამართლე წევრი ანა დოლიძე მოსამართლე ლევან მურუსიძის უვადოდ განწესებას.

მისი თქმით, კონკრეტული გუნდი, რომელიც არის საქართველოს პარლამენტში, პირდაპირ პასუხისმგებელია ამ შედეგზე. დოლიძე მმართველ პარტიას "გამოფხიზლებისკენ" მოუწოდებს.

"იუსტიციის საბჭო ყოველდღე გვაოცებს კიდევ უფრო სამარცხვინო გადაწყვეტილებების მიღებით და სად აღმოვჩნდებით ბოლოში, არ ვიცი. ლევან მურუსიძე აღმოჩნდა საბჭოს თვალში ყველანაირი პროცედურის და კანონის დარღვევით კეთილსინდისიერი მოსამართლე. ის ფორმალურად რომ ვთქვათ, დაინიშნა უვადოდ, თუმცა ლევან მურუსიძე სასამართლოში იპარპაშებს მანამ, სანამ საქართველოში იპარპაშებს აი ეს ჯგუფი, რომელიც ერთმანეთთან გადაბმულია და რომელთა მთავარი ამოცანა, როგორც ჩანს, არის ნელ-ნელა დააზიანოს და გამოშიგნოს ჩვენი სახელმწიფო ინტერესი.

მე ვუსამძიმრებ ჩვენს მოსახლეობას, რომ დღეს საბჭომ მიიღო ეს გადაწყვეტილება. ვფიქრობ, ჩვენი ხელისუფლება, კონკრეტული გუნდი, რომელიც არის საქართველოს პარლამენტში, პირდაპირ არის პასუხისმგებელი ამ შედეგზე და ჩვენ რომ საბოლოო ჯამში ამ შედეგამდე მივედით. თუ არ გამოფხიზლდა "ქართული ოცნება" და პარლამენტის შემადგენლობა, ეს არ იქნება დასასრული იუსტიციის საბჭოს თავხედობის, უარეს ქმედებას მომავალში უნდა ველოდოთ. ჩვენ მაქსიმალურად, რაც შეგვეძლო გავაკეთეთ მე და ქალბატონმა ნაზიმ, მაგრამ ახლა სიტყვა არის პოლიტიკურ ძალებზე, რამდენად მისცემენ საშუალებას, რომ ამ ჯგუფმა სრულად გაშალოს ფრთები სასამართლოს ფარგლებში და შესაბამისად, სახელმწიფოს მასშტაბებით", - განაცხადა ანა დოლიძემ.