კომენტარი

ცხადად ჩანს, რომ ბიზნესმენები ეძებენ გამოსავალს კრიმინალური გზებით, გარჩევებით - დავით ბეგიაშვილი

ტელეკომპანია ,,იბერიას“ თოქ-შოუ ,,ბიზნეს კოდი“ ალბატროსის დამფუძნებელს, დავით ბეგიაშვილს სკაიპით შვეიცარიაში დაუკავშირდა და მის კომპანიასთან დაკავშირებულ ბიზნეს დავაზე ესაუბრა.

ჩამორთმეული ქონების ნაწილი დავით ბეგიაშვილმა 2012 წელს მოსული ხელისუფლების მიერ გაცხადებული სამართლიანობის აღდგენის პირველი ტალღის ფარგლებში დაიბრუნა, მათ შორის თბილისში, ჭავჭავაძის გამზირზე კომპანია ,,ალბატროსის“ ფართში შესვლაც შეძლო, თუმცა 6 წლის შემდეგაც კი, დოკუმენტურად საკუთრების დაბრუნების გაფორმება არ მომხდარა.

დავით ბეგიაშვილის განცხადებით, მაღალჩინოსნების მიერ ბიზნესში ,,ჩაჯდომა“ და წილების გადანაწილება დღესაც გრძელდება.

,,ერთი თვის წინ შედგა პარლამენტში შეხვედრა პრემიერ-მინისტრის დეპუტატებთან და იქაც კი ითქვა, რომ პრემიერი პირადად დაინტერსდებოდა საკითხით. თანაც გვერდს ეკონომიკის მინისტრი უმშვენებდა და ითქვა, რომ გადაწყდებოდა ეს პრობლემა, რაც სამწუხაროდ, არ მომხდარა.

შექმნილი ვითარებიდანაც ცხადად ჩანს, რომ ბიზნესმენები ეძებენ გამოსავალს კრიმინალური გზებით, გარჩევებით. არ არიან დარწმუნებულები, რომ სამართალდამცავი ორგანოებისადმი მიმართვით რამეს მიაღწევენ ან სასამართლოს გზით. ამიტომ, როგორც ჩანს ერიდებიან ამ გზას და კრიმინალური მეთოდებით აგვარებენ საქმეებს. ამის ნათელი მაგალით იყო ჩემი მეგობრის, ბესო ხარძიანის მკვლელობა. გამოასალმეს სიცოცხლეს, პროკურატურამ გახსნილადაც კი გამოაცხადა ეს საქმე და ამით დამთავრდა ყველაფერი.

როგორც ჩანს, მოქმედი ხელისუფლება უარს არ ამბობს წინა ხელისუფლების მეთოდებზე; ხდება ბიზნეს სფეროების გადანაწილება და ეს შემთხვევებიც ამის დასტურია“, - აცხადებს დავით ბეგიაშვილი.