მსოფლიო

წითელი ჯვარი: ალეპოდან ევაკუაციას ათობით ათასი ადამიანი ელოდება

სირიის ქალაქ ალეპოდან მეამბოხეთა და მშვიდობიანი მოსახლეობის ევაკუაცია გრძელდება.

როგორც მედიას წითელი ჯვრის საერთაშორისო კომიტეტის წარმომადგენელმა განუცხადეს, გასული ღამის განმავლობაში,ცეცხლის შეწყვეტის შესახებ რეჟიმი არ დარღვეულა. ორგანიზაციის მონაცემით, ქალაქის დატოვებას კიდევ ათი ათასობით ადამიანი ელოდება.

რუსეთის თავდაცვის სამინისტროს ინფორმაციით, ალეპოს აღმოსავლეთ ნაწილიდან 6 462 ადამიანია გაყვანილი, მათ შორის სამი ათასი მეამბოხე.

გაეროს შეფასებით კი, ქალაქის აღმოსავლეთ კვარტლებში ევაკუაციას 50 ათასამდე ადამიანი ელოდება.

სირიის პრეზიდენტმა ბაშარ ალ ასადმა მოსახლეობისადმი ვიდეომიმართვაში განაცხადა, რომ ალეპოდან მეამბოხეთა გაძევება „ისტორიული მოვლენაა“.

ამასთან, დასავლეთის ქვეყნები სირიის არმიას და მასთან ერთობლივად მოქმედ სამხედრო დაჯგუფებებს აკრიტიკებენ და აღნიშნავენ, რომ ქალაქში წინააღმდეგობის დასაძლევად სასტიკი მეთოდები იყო გამოყენებული, რამაც მშვიდობიან მოსახლეობაში მრავალი დაღუპვა გამოიწვია.

ევროკავშირის ქვეყნების ლიდერებმა კი, სირიის კონფლიქტში მონაწილე მხარეებზე დიპლომატიური წნეხის მოხდენაზე შეთანხმდნენ, იმისათვის რომ სირიაში ჰუმანიტარული დახმარების მიწოდებისა და ალეპოდან მშვიდობიანი მოსახლეობის ევაკუაციის შესაძლებლობა მოიპოვონ.

„სირიის რეჟიმისა და მისი მომხრეების, კერძოდ რუსეთისა და ირანის სისასტიკის წინაშე არც ისე ეფექტურები ვართ, როგორც შეიძლება გვსურდეს, მაგრამ ადამიანების ტანჯვაზე გულგრილები არ ვართ“,-აღნიშნა ევროკავშირის პრეზიდენტმა დონალდ ტუსკმა.

გერმანიის კანცლერმა ანგელა მერკელმა კი განაცხადა, რომ სირიის გამო რუსეთის წინააღმდეგ სანქციების შემოღების საკითხში „არც ერთი ვარიანტის გამორიცხვა არ შეიძლება“.

გუშინ, სირიის ალეპოდან მეამბოხეთა და მშვიდობიანი მოსახლეობის ევაკუაციის ოპერაცია დაიწყო.

აღმოსავლეთ ალეპო მეამბოხეთა კონტროლ ქვეშ ოთხი წლის განმავლობაში იმყოფებოდა.

სირიის მთავრობამ 13 დეკემბრეს განაცხადა, რომ ქალაქი სრულ კონტროლზე აიყვანა.

მონიკა დავლიანიძე