კომენტარი

ცესკო-ს წინააღმდეგ კამპანია ენმ-ისა და მისი ფილიალების მიერაა დაწყებული - თეა წულუკიანი

იუსტიციის მინისტრის, თეა წულუკიანის შეფასებით, ოპოზიციის პრეტენზიები ცესკოს მიმართ არის ანტიპროპაგანდა და მიზანმიმართული თავდასხმა. მინისტრის თქმით, ამ კამპანიაში საქართველოს ახალგაზრდა იურისტთა ასოციაცია გაუაზრებლად მონაწილეობს.

„კამპანია, რომელიც ხორციელდება ცესკო-სა და ზოგადად საარჩევნო ადმინისტრაციის წინააღმდეგ, ეს „ერთიანი ნაციონალური მოძრაობისა“ და მისი ფილიალების მიერ დაწყებული კამპანიაა, ეს ფაქტია. ამის დასტურია საუბარი ბოლო უწყებათაშორისი კომისიის სხდომაზე, თითქოს „ქართული ოცნების“ წევრები, სუს-ის ოჯახის წევრები არიან საოლქო კომისიებში და სხვაგან, მაგრამ საია-ს წარმომადგენელმა ამასთან დაკავშირებით დოკუმენტები ვერ წარმოგვიდგინა“, – განაცხადა წულუკიანმა.

მისივე თქმით, საია-ს ამ დრომდე არ წარუდგენია უწყებათაშორის კომისიაზე, რას ეყრდნობოდა კვლევა საარჩევნო ადმინისტრაციის დარღვევებთან დაკავშირებით.

ცნობისთვის, ენმ-ის პრეტენზია ეხება საოლქო და საუბნო კომისიების დაკომპლექტებას. პარტიის წევრთა მტკიცებით, საარჩევნო კომისიები „ქართული ოცნების“ მხარდამჭერებითა და აქტივისტებით კომპლექტდება.