კომენტარი

წარმოუდგენელია მოსამართლემ პოლიტიკური ზეგავლენით მიიღოს გადაწყვეტილება - რუსთავი2-ის საქმის მოსამართლე

უზენაესი სასამართლოს მოსამართლის, ასევე რუსთავი2-ის საქმის განმხილველი დიდი პალატის წევრი ზურაბ ძლიერიშვილი რუსთავი2-ის საქმესთან დაკავშირებით უზენაესი სასამართლოს მიერ მიღებულ გადაწყვეტილებაში პოლიტიკურ ზეგავლენებს გამორიცხავს.

როგორც მოსამართლემ რუსთავი2- თვის მიცემულ ინტერვიუში განაცხადა, იგი მხარეებს მოუწოდებს, დაელოდონ უზენაესი სასამართლოს დასაბუთებულ გადაწყვეტილებას.

„დაელოდეთ დიდი პალატის დასაბუთებულ მოტივირებულ გადაწყვეტილებას, სადაც თქვენ ნახავთ ბუნებრივია იმ მოტივაციას, რატომ მივიდა დიდი პალატა ამ გადაწყვეტილებამდე და ბუნებრივია, ამის მერე შეიძლება იქნეს პასუხები გაცემული, როგორც სამოტივაციო ნაწილზე, ასევე სხვა დანარჩენ საკითხებზე“,-აღნიშნა ძლიერიშვილმა.

რაც შეეხება სტრასბურგის სასამართლოს გადაწყვეტილებას, ზურაბ ძლიერიშვილი აღნიშნავას, რომ მას სამოსამართლო ეთიკა არ აძლევს შესაძლებლობას, რომ წინასწარ გამოთქვას აზრი.

ჟურნალისტის მიერ დასმულ კითხვაზე, იყო თუ არა საკმარისი ორი დღე საქმის განსახილველად და გადაწყვეტილების მისაღებად, მოსამართლე ზურაბ ძლიერიშვილი ამბობს, რომ კოლეგიას არა ორი დღე, არამედ რამდენიმე თვე ჰქონდა.

„თქვენ ნახავთ საქმის მასალებში, რომ ეს არის არასწორი ინფორმაცია. კოლეგიას ჰქონდა არა ორი დღე, არამედ რამდენიმე თვის ვადა, ეს საქმის მასალებში დევს“ - აცხადებს ძლიერიშვილი.

მისი თქმით, დიდი პალატის განხილვის საკითხი იყო საკუთრებასთან დაკავშირებული დავა და შესაბამისად, სასამართლომ თავისი სამართლებრივი ვალდებულება შეასრულა.

„ჩვენი განხილვის საკითხი იყო სწორედ საკუთრებასთან დაკავშირებული დავა. სასამართლომ თავის სამართლებრივი ვალდებულება შეასრულა. შესაბამისად, უკვე აღსრულების საკითხი და შემდგომ პროცედურები, ეს არის სასამართლოს ფარგლებს გარეთ“,-აღნშნა უზენაესი სასამართლოს მოსამართლემ.

რაც შეეხება მოსამართლეზე პოლიტიკური ზეგავლენის მოხდენის საკითხს, ძლიერიშვილი აცხადებს, რომ ეს მისთვის სრულიად წარმოუდგენელია, რადგან, მოსამართლის თქმით, საზოგადოებისთვის ცნობილია მისი და მისი კოლეგების ნებისმიერი საქმისადმი ნეიტრალური დამოკიდებულება.

"მოსამართლემ შესაძლოა პოლიტიკური ზეგავლენით თუ სხვა გავლენებით მიიღოს გადაწყვეტილება, ეს არის სრულიად წარმოუდგენელი. მითუმეტეს, ყველასთვის კარგად არის ცნობილი, პირადად ჩემი და ჩემი კოლეგების ნეიტრალური დამოკიდებულება პოლიტიკური საკითხების მიმართ,“ - აცხადებს მოსამართლე ზურაბ ძლიერიშვილი.

მონიკა დავლიანიძე