კომენტარი

წამლებზე ფასები განსაკუთრებულად არის მომატებული - აკაკი ზოიძე

პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარის, აკაკი ზოიძის განცხადებით, ქვეყანაში მედიკამენტებზე ფასი, საშუალოდ 15%-ით არის მომატებული.

ამასთან, ზოიძის თქმით, ქვეყანაში ინფლაცია 6-7%-ის წარმოადგენს.

„ზოგადად, ინფლაცია მეტნაკლებად 6-7%-ზე მერყეობს, მაგრამ წამლებზე არის განსაკუთრებულად მომატებული ფასი. ბოლო ერთი წლის განმავლობაში დაახლოებით 15%-ია თუ არ ვცდები და ეს შემაშფოთებელია“,- აღნიშნა დეპუტატმა.

მისი თქმით, მთავრობა დამატებით ზომებზე მუშაობს ჯანდაცვის სამინისტროსთან ერთად.

„პირველი რაც გაკეთდა სოციალურად დაუცველი მოქალაქეებისთვის, რომლებსაც აქვთ 100 ათასამდე სარეიტინგო ქულა, სასიცოცხლოდ ყველაზე აუცილებელი 30 სახელწოდების მედიკამენტი არის პრაქტიკულად უფასო, სიმბოლურ 1 ლარად. ეს დამერწმუნეთ, ძალიან დიდი შეღავათია, იმიტომ რომ მათ ამ წამლებში პენსიის და შემწეობის ნახევარი ეხარჯებოდათ, მაგრამ მათ ექნებათ პრაქტიკულად უფასოდ“,- განმარტა აკაკი ზოიძემ.

მონიკა დავლიანიძე