მსოფლიო

ცალკეული ჯიჰადისტის მხრიდან ევროპაში თავდასხმების განხორციელების ალბათობა ძალიან მაღალია - ევროპოლის ხელმძღვანელი

ევროპოლის ხელმძღვანელის, რობ უეინრაიტის თქმით, ევროპის ქვეყნების დაზვერვების თანამშრომლობამ მსხვილი ტერაქტების არიდების საშიშროება შეამცირა.

ამასთან, უეინრაიტმა BBC-თვის მიცემულ ინტერვიუში აღნიშნა,რომ ცალკეული ჯიჰადისტის მხრიდან თავდასხმების ალბათობა ძალიან მაღალია.

„საშიშროება, რომელსაც ისინი წარმოადგენენ, სხვადასხვა კომპონენტს შეიცვას და ჩვენ მჭიდრო თანამშრომლობისა და ინფორმაციის გაცვლის მეშვეობით უნდა გავნსაზღვროთ, თუ ვინ შეიძლება წარმოადგენდეს სერიოზულ საშიშროებას“,-განაცხადა ევროპოლის ხელმძღვანელმა.

გუშინ ევროპოლმა მოხსენება გამოაქვეყნა რომელშიც „ისლამური სახელმწიფოს“ მებრძოლების მხრიდან ტერორისტული თავდასხმების ალბათობის ზრდაზეა საუბარი.

ევროპის პოლიციის ექსპერტები მიიჩნევენ, რომ ახლო აღმოსავლეთში პოზიციების დათმობის კვალდაკვალ, ISIS რიგებში მებრძოლი ევროპის ქვეყნების მოქალაქეები, სახლში დაბრუნებას ეცდებიან.

მოხსენების ავტორები მიიჩნევენ, რომ ჯიჰადისტთა ნაწილი, სავარაუდოდ, ევროპაში უკვე მოხვდა და შესაძლებელია მსგავსი თავდასხმები განახორციელონ.

თავდასხმების სავარაუდო სცენარი შეიძლება იყოს: დანაღმული ავტომობილების აფეთქება, გატაცებები და გამოძალვა.

ამასთან, ევროპოლის ექსპერტების აზრით, მსხვილი ობიექტების აფეთქება, როგორიც არის, მაგალითად ელექტროსადგურები - ნაკლებ სავარაუდოა.

მონიკა დავლიანიძე