მსოფლიო

ტრამპს რუსეთთან საერთო ინტერესების ხედვა აკავშირებს - ენტონი სკარამუჩი

დავოსში რუსულ ТАСС-თან ინტერვიუში დონალდ ტრამპის მრჩეველმა ბიზნესის საკითხებში ენტონი სკარამუჩიმ აღნიშნა, რომ აშშ-სა და რუსეთს სჭირდება მოლაპარაკებების დაწყება, რათა უკეთეს შეთანხმებას მიაღწიონ , ვიდრე ერთმანეთის წინააღმდეგ წარმოებული სანქციები.

მისი თქმით, დონალდ ტრამპს რუსეთთან “საერთო ინტერესების ხედვა“ აკავშირებს:

“სავარაუდოდ, ერთი წლის შემდეგ უკეთესი ურთიერთობა გვექნება რუსეთთან და რუს ხალხთან. არ ვამბობ, რომ ასე მოხდება. ვინ იცის, რა გარემოებები იმოქმედებენ ჩვენს ურთიერთობაზე, მაგრამ, ყოველ შემთხვევაში, ასე გვსურს“,- ამბობს სკარამუჩი.

დონალდ ტრამპის მრჩეველმა გააკრიტიკა აშშ-ის ყოფილი პრეზიდენტის, ბარაკ ობამას ადმინისტრაციის პოლიტიკა რუსეთის წინააღმდეგ სანქციების დაწესების გამო. სკარამუჩიმ თქვა, რომ სანქციებს მოჰყვა “უკურეაქცია რუსი ხალხის ხასიათის გამო“:

“ვფიქრობ, რუსები მზად არიან, თოვლი ჭამონ, რათა გადარჩნენ. ვფიქრობ, სანქციებმა მეტი მხარდაჭერა აღუძრა ხალხს თქვენი პრეზიდენტის მიმართ“,- განაცხადა სკარამუჩიმ.

მან განმარტა, რომ სანქციები იმიტომ შემოიღეს, რადგან რუსეთის მთავრობის მოქმედებებმა საერთაშორისო არენაზე “უნდობლობა“ გამოიწვია. მან მოუწოდა უკეთესი ალტერნატივის მოძებნისკენ.

შეგახსენებთ, ტრამპა ბრიტანულ Times-თან ინტერვიუში განაცხადა, რომ მზადაა, მოუხსნას რუსეთს სანქციები ბირთვული მარაგის შემცირების სანაცვლოდ.

ანა მებურიშვილი