მსოფლიო

ტრამპის საპრეზიდენტო კამპანიის ყოფილი ხელმძღვანელი პოლ მანაფორტი უკრაინის ყოფილი პრორუსი პრეზიდენტის ლობირებისთვის ევროპელ პოლიტიკოსებს ფულს უხდიდა

2016 წლის დონალდ ტრამპის საპრეზიდენტო კამპანიის ყოფილი ხელმძღვანელის პოლ მანაფორტის შესახებ ახალი დეტალები გახდა ცნობილი.

მანაფორტის ყოფილმა მრჩეველმა, რიჩარდ გეიტსმა ბრალი აღიარა ისეთ დანაშაულებში, როგორებიცაა უკანონო ფინანსური ოპერაციების განხორციელება, ლობისტური საქმიანობისას დარღვევები უკრაინის მთავრობისა და „რეგიონების პარტიის“ (უკრაინული პოლიტიკური პარტია, რომლის ლიდერიც 2010-2014 წლებში იყო ვიქტორ იანუკოვიჩი) სასარგებლოდ, ასევე გამოძიების ფედერალური ბიუროსთვის ცრუ ჩვენებების მიცემა. ჩვენებიდან ირკვევა, რომ გეითსი ამ ყველაფერს მანაფორტის მითითებით ასრულებდა.

ჩვენების თანახმად, 2008-2014 წლებში მისი თანამონაწილეობით მანაფორტმა მიიღო მილიონობით დოლარის ოდენობით გადარიცხვები, ისინი გადასახადების გადახდას თავს არიდებდნენ. გეითსი მანაფორტის თანხმობით ყალბ ფინანსურ ანგარიშებს წარმოადგენდა, რათა დაემალა ინფორმაცია მანაფორტის საბანკო ანგარიშების შესახებ.

გეითსმა მოჰყვა, რომ 2012 წელს მანაფორტმა ყოფილ წამყვან ევროპულ პოლიტიკოსებს ფარულად ფული გადაუხადა უკრაინის ყოფილი პრორუსულად განწყობილი პრეზიდენტის, ვიქტორ იანუკოვიჩის ლობირებისთვის. საუბარია 2 მილიონ ევროზე.

გეითსის ჩვენების თანახმად, ის აშშ-სა და ორ ლობისტურ ფირმას შორის მუშაობას უწევდა კოორდინაციას. ისინი ცდილობდნენ გავლენა მოეხდინათ აშშ-ს კონგრესის წევრების აზრზე ისეთ საკითხებთან დაკავშირებით, როგორიცაა: უკრაინაში არჩევნების კანონიერება და იანუკოვიჩის მიერ საპრეზიდენტო პოსტზე თავისი მოწინააღმდეგის იულია ტიმოშენკოს დაპატიმრების კანონიერება.

გეითსის ჩვენებიდან ირკვევა, რომ იანუკოვიცის „რეგიონების პარტიის“ ლობირების ერთ-ერთი მიზანი იყო უკრაინის ევროკავშირში შესვლა. ამასთანავე, გეიტსმა აღნიშნა, რომ მანაფორტი სამუშაოს შესახებ ინფორმაციას უშუალოდ იანუკოვიჩს ან მის გარემოცვას აწვდიდა.

ცნობისთვის, პოლ მანაფორტსა და რიკ გეითს ოფიციალურად წარუდგინეს ბრალი 12 მუხლში, მათ შორისაა შეთქმულება აშშ-ის წინააღმდეგ. ორივეს ბრალი წარუდგინა სპეცპროკურორმა რობერტ მიულერმა, რომელიც 2016 წლის საპრეზიდენტო არჩევნებში რუსეთის შესაძლო ჩარევას იძიებს.

ანა მებურიშვილი