კომენტარი

ტრამპის გაპრეზიდენტებით, რუსეთისთვის გამოცხადებული ეკონომიკური სანქციები და პრესინგ-პოლიტიკა შესაძლოა გადახედვას დაექვემდებაროს - ლევან კალანდაძე

ეკონომიკის საკითხებში ექსპერტი ლევან კალნდაძე მიიჩნევს, რომ დონალდ ტრამპის გაპრეზიდენტება ამერიკის პოლიტიკას საქართველოსადმი არ შეცვლის.

„შეერთებული შტატების პოლიტიკა სტრატეგიულ პარტნიორებთან მიმართებაში ამით არ იცვლება. მიუხედავად ამისა, ბუნებრივია, მოსალოდნელია რიგი ცვლილებები საერთაშორისო ურთიერთობებში და ამ შესაძლო ცვლილებებს საქართველო მომზადებული უნდა შეხვდეს. მათ შორის პირველ რიგში, ეს, სავარაუდოდ, აშშ-რუსეთის ურთიერთობების ახალი ფორმატი გახდება. დიდი ალბათობით, წარსულში აშშ-ს მიერ დაანონსებული ე.წ. გადატვირთვა რუსეთთან მიმართებაში არ მოხდება“,-აღნიშნა ექსპერტმა.

მისივ თქმით, შესაძლოა ტრამპის ადმინისტრაციამ რუსეთისადმი დაწესებული სანქციებისა და პრესინგ-პოლიტიკას გადახედოს.

„სავარაუდოა, რუსეთისთვის გამოცხადებული ეკონომიკური სანქციები და პრესინგ-პოლიტიკა გადახედვას, ან გარკვეულ კორექტირებას დაექვემდებაროს. ბუნებრივია, აშშ-რუსული ურთიერთობების მოსალოდნელი ახალი ფორმატი, გარკვეული თვალსაზრისით, გამოწვევა იქნება საქართველოსთვის. თუმცა ძირითადი პოლიტიკური კურსი და პარტნიორობა არ შეიცვლება“, -განაცხადა კალანდაძემ.

მონიკა დავლიანიძე