კომენტარი

თქვენ ძალიან დიდი დრო გქონდათ იმისთვის, რომ შეგესრულებინათ დაპირებები - გიორგი ვაშაძე ბიძინა ივანიშვილს

თქვენ ძალიან დიდი დრო გქონდათ იმისთვის, რომ შეგესრულებინათ დაპირებები, გეზრუნათ ხალხის პრობლემებზე, - ასე ეხმაურება „ქართული ოცნების“ პარტიის თავმჯდომარის მიმართვას გაერთიანებული ოპოზიციის „ძალა ერთობაშია“ ერთ-ერთი ლიდერი, გიორგი ვაშაძე.

მისი თქმით, ივანიშვილი და მისი გუნდის წევრები საზოგადოების დაშინებას ცდილობენ.

როგორც ვაშაძემ აღნიშნა, გაერთიანებული ოპოზიციაა იმის გარანტია, რომ გრიგოლ ვაშაძის გამარჯვების შემთხვევაში ქვეყანაში არანაირი პოლიტიკური დაპირისპირება არ მოხდება.

„თქვენ მილიონმა ადამიანმა გამოგიცხადათ სრული უნდობლობა. ის, რაც მოვისმინეთ, ეს არის კიდევ ერთი ტყუილი დაპირებები, რომელ სიტყვასაც უკვე ფასი აღარ აქვს საქართველოს არცერთი მოქალაქისთვის.

რაც ყველაზე მთავარია შეეშვით ხალხის დაშინებას. არანაირი დაპირისპირება, არანაირი ანგარიშსწორება არ იქნება ქვეყანაში ჩვენ ვართ გარანტი იმის, რომ ყოველგვარი დაპირისპირების გარეშე მშვიდობიანად მოხდება ხელისუფლების ცვლილება.

ყველა თქვენს ძალადობრივ ფაქტზე, რასაც თქვენ ახორციელებთ ამ დღეების მანძილზე ჩვენ მშვიდობით გპასუხობთ.

ეს სიტყვა რასაც თქვენ ამბობთ, რა კავშირშია ახალქალაქში თქვენს მიერ მოწყობილ მართლა თავპირის მტვრევასთან, რაც ჩვენს აქტივისტებს მოუწყვეთ.

ჩვენ მშვიდად და წყანარად დავიწყებთ ქვეყნის აღმშენებლობის პროცესს და სრულიად ახალი განვითარების ეტაპს,“- განაცხადა გიორგი ვაშაძემ.

გაერთიანებული ოპოზიციის ერთ-ერთი ლიდერი ტელეკომპანია „იმედის“ ეთერში გუშინ გასულ სიუჟეტსაც გამოეხმაურა. მისი თქმით, ტელეკომპანიამ მინიმუმ ბოდიში უნდა მოიხადოს, რადგან მისი ძმა - დავით ვაშაძე რუს კონსულტანტად ევგენი რეშეტნიკად გაასაღეს.

„მინდა „იმედს“ და ბევრ ღირსეულ ჟურნალისტს, რომელიც იქ არის მივმართო, მესმის , რომ საგანგებო რეჟიმში ხართ, მაგრამ რაღაცას ხომ აქვს საზღვარი“, - განაცხადა ვაშაძემ.