კომენტარი

ტყუილად არ ხდება, რომ ტრამპის არც ერთ მრჩეველს და არც თვითონ ტრამპს საქართველო არ უხსენებია - გრიგოლ ვაშაძე

საქართველოს ყოფილი საგარეო საქმეთა მინისტრის გრიგოლ ვაშაძის შეფასებით, ერთი შანსი არ არსებობს იმისა, რომ დონალდ ტრამპის ადმინისტრაცია საქართველოსა და უკრაინის ტერიტორიული მთლიანობის დარღვევას დაეთანხმოს.

ამის შესახებ ვაშაძემ „ტვ პირველის“ ეთერში, ამერიკის 45-ე პრეზიდენტად დონალდ ტრამპის არჩევის პირობებში ამერიკა-საქართველოს ურთიერთობების პერსპექტივებზე საუბრისას განაცხადა.

„ერთი შანსი არ არსებობს იმის, რომ შეერთებული შტატების პოლიტიკური ელიტა თავისი 45-ე პრეზიდენტით, დათანხმდნენ საქართველოს ან უკრაინის ტერიტორიული მთლიანობის დარღვევას. ერთი შანსი არ არსებობს იმისი, რომ სირიაში შედგეს ისეთი მოლაპარაკება, რომელიც დასავლურ ღირებულებებს და იდეალებს ეწინააღმდეგება“,-განაცხადა საქართველოს ყოფილმა პირველმა დიპლომატმა.

მისივე თქმით, ქართულ დიპლომატიას და ვაშინგტონში გავლენის მქონე პირებს,თავის დროზე ჰილარი კლინტონისა და დონალდ ტრამპის საარჩევნო შტაბებთან მუშაობა უნდა დაეწყოთ.

„ჩვენ ამ მატარებელზე დავაგვიანეთ. მას შედეგ რაც პრაიმერიზი მოიგეს ქალბატონმა კლინტონმა და ბატონმა ტრამპმა თავის პარტიებში, საქართველოს დიპლომატიასაც და იმ ადამიანებსაც ვისაც შესაბამისი გავლენა აქვთ ვაშინგტონში, ამ ადამიანებს მუშაობა უნდა დაეწყოთ უკვე კანდიდატების შტაბებში. ტყუილად არ ხდება, რომ ტრამპის არც ერთ მრჩეველს, და არც თვითონ ტრამპს საქართველო არ უხსენებია. თუმცა უკრაინა ბევრჯერ იყო ნახსენები. ეს ძალიან სამწუხაროა“,-განაცხადა ვაშაძემ.

მონიკა დავლიანიძე