მსოფლიო

თითქმის ყველა პოსტსაბჭოთა რესპუბლიკას რუსეთის მიერ გაჩაღებულ შიდა კონფლიქტებთან უწევთ გამკლავება - ანგელა მერკელი

გერმანიის კანცლერმა, ანგელა მერკელმა ლიეტუვაში დისლოცირებული გერმანელი სამხედროების წინაშე სიტყვით გამოსვლისას განაცხადა, რომ რუსეთი საქართველოსა და სხვა პოსტსაბჭოთა ქვეყნებში სიტუაციის დესტაბილიზაციას ეწევა.

„ჩვენ ვხედავთ, რომ თითქმის ყველა ყოფილ საბჭოთა რესპუბლიკას, რომლებიც ევროკავშირისა და ნატო-ს წევრები არ არიან, რუსეთის მიერ გაჩაღებულ შიდა კონფლიქტებთან უწევთ გამკლავება“, - განაცხადა მერკელმა.

მან ასევე აღნიშნა, რომ დღეს ეს ქვეყნები საკუთარი ტერიტორიული მთლიანობის აღდგენას ცდილობენ, ვინაიდან რუსეთმა მათი ტერიტორიების ნაწილი მიითვისა ან იქ კონფლიქტები გააჩაღა. მაგალითისთვის მერკელმა უკრაინაში, საქართველოში, სომხეთში, მოლდოვასა და აზერბაიჯანში შექმნილი სიტუაცია დაასახელა.