მსოფლიო

ტერორისტები 2001 წლის 11 სექტემბრის ტერაქტის მსგავსი „დიდი აფეთქებისთვის“ ემზადებიან - აშშ-ის შიდა უსაფრთხოების სამსახური

აშშ-ის შიდა უსაფრთხოების მდივნის მოვალეობის შემსრულებელმა ელეინ დიუკმა განაცხადა, რომ ისლამური სახელმწიფო და სხვა ტერორისტული დაჯგუფებები ემზადებიან 2001 წლის 11 სექტემბერის მსგავსი „დიდი აფეთქების“ მოწყობისთვის.

მან დაზვერვის ინფორმაციაზე დაყრდნობით განაცხადა, რომ ტერორისტები თავდასხმას ავიაციის მეშვეობით აპირებენ, რათა ამას რაც შეიძლება დიდი მსხვერპლი მოჰყვეს.

ლონდონში ამერიკის საელჩოში გამოსვლისას დიუკმა აღნიშნა, რომ პატარ-პატარა ტერორისტული აქტები, დანებითა და სატვირთო მანქანებით თავდასხმები დაჯგუფებებს იმიტომ აწყობთ, რომ ასე უკეთ ჩართავენ თავიანთ წევრებს და მოემზადებიან უფრო მასშტაბური შეტევისთვის.

„ვფიქრობთ, ტერორიზმის საფრთხე აშშ-ში განსაკუთრებით მაღალია“, - თქვა დიუკმა.

მან ასევე დაამატა, რომ შტატებში მზარდია მარტოხელა ექსტრემისტების რაოდენობა, რომლებიც შთაგონებული არიან ტერორისტული ორგანიზაციებით.

„ტერორისტები ძლიერები არიან, ისინი ყველაფერს ერგებიან და ტერორიზმის საფრთხე ძალიან მაღალია 2001 წლის 11 სექტემბრის შემდეგ. შესაბამისად, ჩვენს ხელთ არსებულ ყველა ზომას მივმართავთ“, -თქვა აშშ-ის შიდა უსაფრთხოების მდივნის მოვალეობის შემსრულებელმა.

შეგახსენებთ, 2001 წლის სექტემბრის ტრაგედიას 2,996 ადამიანის სიცოცხლე ემსხვერპლა. მაშინ ალ-ქაიდას თვითმკვლელმა ტერორისტებმა თვითმფრინავებით შეეჯახნენ მსოფლიო სავაჭრო ცენტრს ნიუ-იორკში და პენტაგონს ვაშინგტონში.

ანა მებურიშვილი