კომენტარი

ტერიტორიული მთლიანობის აღდგენის კუთხით საქართველოსთვის მატარებელმა უკვე ჩაიარა და უკან აღარ დაბრუნდება - ალექსეი მალაშენკო

რუსი პოლიტოლოგისა და მოსკოვის კვლევითი ინსტიტუტ ”ცივილიზაციათა დიალოგის” სამეცნიერო კვლევების ხელმძღვანელის, ალექსეი მალაშენკოს მტკიცებით, საქართველოს ტერიტორიული მთლიანობის აღდგენა ისევეა შეუძლებელი, როგორც დაშლილი საბჭოთა კავშირის.

„სამწუხაროდ, საქართველოსთვის მატარებელმა უკვე ჩაიარა და უკან აღარ დაბრუნდება. ეს იგივეა, რომ საბჭოთა კავშირიც აღარასოდეს აღდგება. ხომ ხედავთ რა ხდება ბოლო 20 წლის განმავლობაში, ეს ადამიანური ტრაგედიაა. მაგრამ თქვენ გჯერათ, რომ როდესმე იუგოსლავია აღდგება? მინდა, რომ ყველა სახელმწიფო, რომელიც არსებობდა, იყოს მთლიანი, მათ შორის, როგორ პარადოქსულადაც არ უნდა მოგეჩვენოთ, საბჭოთა კავშირიც“,- განაცხადა მალაშენკომ.

მალაშენკო თბილისში მიმდინარე მედიაფორუმს ესწრება, რომელიც რუსეთის პრეზიდენტის გრანტითაა დაფინანსებული. ღონისძიებაში რუსეთის პროსახელისუფლებო მედიასაშუალებების წარმომადგენლები იღებენ მონაწილეობას.

აღნიშნული მედიაფორუმის მთავარი თემაა „მედიის როლი რეგიონში ნდობის აღდგენაში“.

ცნობისთვის, სამშაბათს საქართველოს საზღვრიდან გააბრუნეს ფორუმის 3 მომხსენებელი: ИТАР-ТАСС-ის სამხედრო მიმომხილველი ვიქტორ ლიტოვკინი, საზოგადოების მკვლევართა ასოციაციის წევრი გენადი ბოდრიუგოვი და НТВ-ის ჟურნალისტი ალექსანდრ ტოკარევი. ამის მიზეზად შსს-მ ოკუპაციის კანონის დარღვევა დაასახელა.

ფორუმის ორგანიზატორებს შორის არის გაზეთი „საქართველო და მსოფლიო“, რომლის გამომცემელია ალექსანდრე ჭაჭია.