მსოფლიო

თემურ მახაური პუტინის რეჟიმს ებრძოდა და რამზან კადიროვის პირადი მტერი იყო - უკრაინის უსაფრთხოების სამსახური

კიევში, ავტომობილის აფეთქების შედეგად გარდაცვლილი პირი არის ალი ტიმაევი, იგივე თემურ მახაური, 04.04.1978 წელს დაბადებული. იგი ჩეჩნეთის რესპუბლიკის იტუმ-კალინინსკის რაიონის სოფელ გუჩუმ-კალედან იყო.

ამის შესახებ UNIAN-ი უკრაინის უსაფრთხოების სამსახურის მიერ გავრცელებულ განცხადებაზე დაყრდნობით წერს.

უწყების ინფორმაციით, მახაური პუტინის რეჟიმს ებრძოდა, ასევე რამზან კადიროვის პირადი მტერი იყო. გარდა ამისა, იგი 1999-2000 წლებში მონაწილეობდა დაღესტანში სამხედრო მოქმედებებში რუსეთის წინააღმდეგ. 2008 წელს კი, რუსეთ-საქართველოს ომის დროს, საქართველოს მხარეს იბრძოდა.

„მასზე დიდი ხანია „ნადირობენ“ რუსეთის სპეცსამსახურები. ჯამში მასზე 3 თავდასხმა განხორციელდა, მათ შორის 08.03.2009 წელს თბილისში. მაშინ ალი გადარჩა. გარდა ამისა გარდაცვლილი უკრაინაში რუსეთის წინააღმდეგ იბრძოდა“,- აღნიშნავს უკრაინის უსაფრთხოების სამსახური.

გუშინ, 8 სექტემბერს, კიევში, ბესარაბის ბაზრობასთან ახლოს ავტომობილი აფეთქდა, რომლის შედეგად ერთი ადამიანი დაიღუპა.

ავტომობილში მახაურის გარდა ქალიც იჯდა, რომელმაც აფეთქების შედეგად ფეხი დაკარგა.

სამართალდამცველებმა გამოძიება „განზრახ მკვლელობის“ მუხლით აღძრეს.

მონიკა დავლიანიძე