კომენტარი

თეა წულუკიანი ახალი მინისტრთა კაბინეტის წევრი აღარ უნდა იყოს - ანა ნაცვლიშვილი

პრეზიდენტის საპარლამენტო მდივანი ანა ნაცვლიშვილი თეა წულუკიანის იუსტიციის მინისტრობის პერიოდში სასამართლო სისტემაში გატარებულ რეფორმებს აკრიტიკებს.

როგორც ნაცვლიშვილმა ჟურნალისტებს განუცხადა, თეა წულუკიანი არ იყო ეფექტიანი მინისტრი და ვერ შეძლო ქვეყანაში სამართლებრივი რეფორმების გატარება.

„მის მიმართ არსებობს ძალიან ბევრი დასაბუთებული პრეტენზია საზოგადოების სხვადასხვა ჯგუფში. ბოლო დროს განვითარებულმა მოვლენებმა განსაკუთრებით ნათლად გამოაჩინა, რომ მართლმსაჯულების სისტემა შეიძლება ითქვას, საქართველოში ვერ შედგა, ვერ აშენდა, საბაზისო, ფუნდამენტური საკითხები, ჯერ კიდევ კითხვის ნიშნის ქვეშ დგას და თავიდან არის დასაწყები ამ სისტემების შექმნა“, - განაცხადა ნაცვლიშვილმა.

მისივე თქმით, ახალმა პრემიერმა და მთავრობამ თვალი უნდა გაუსწორონ ამ პრობლემას და არსებული ხარვეზებიდან გამომდინარე, თეა წულუკიანი სამთავრობო გუნდში აღარ უნდა იყოს.

ნინო ექვთიმიშვილი