კომენტარი

„თავისუფალი დემოკრატები“ არც ერთი პარტიის მხარდაჭერისკენ არ მოვუწოდებთ არც ერთ მოქალაქეს - ნინო გოგუაძე

„თავისუფალი დემოკრატების“აღმასრულებელი მდივნის ნინო გოგუაძის განცხადებით, პარტია არც ერთ მოქალაქეს რომელიმე პარტიის მხარდაჭერისკენ არ მოუწოდებს.

ამის შესახებ გოგუაძემ მედიასთან საუბარში, ზურაბ აბაშიძის, გია ცაგარეიშვილისა და დავით ონოფრიშვილის მიერ შესაბამისი შინაარსის მოწოდების კომენტირებისას განაცხადა.

ამასთან, გოგუაძის თქმით, „თავისუფალი დემოკრატებისთვის“ მიუღებელი და გაუგებარია იმ ხელისუფლებასთან თანაშრომლობა, რომელსაც ე.წ კაბელების ბიჭების სახით, პოლიტიკური პატიმრები ჰყავს.

„ჩვენ ყველამ გუშინ ერთად ვიხილეთ ჩვენი თანაგუნდელები, რომელთაგან ერთ-ერთი ამბობდა, რომ იგი აღარ აპირებდა ოპოზიციაში ყოფნას და გეგმავდა ხელისუფლებასთან თანამშრომლობას და თანამდებობის დაკავებასაც არ გამორიცხავდა. ეს ჩვენთვის, „თავისუფალი დემოკრატებისთვის“ ცალსახად მიუღებელი და გაუგებარია, რადგან ჩვენ ერთად წამოვედით იმ ხელისუფლების პრინციპულ ოპოზიციაში, რომელსაც ჰყავს პოლიტიკური პატიმრები,კაბელების საქმის ბიჭები არიან პოლიტიკური პატიმრები. ხელისუფლებას, რომელსაც ჰყავს დამორჩილებული სასამართლო და ამის სიმბოლოა მურუსიძე“,-აღნიშნა გოგუაძემ.

ნინო გოგუაძე აღნიშნავს, რომ პარტია მხოლოდ თავისი კანდიდატის, ჭიათურაში მაჟორიტარობის კანდიდატის თემურ გაფრინდაშვილის მხარდაჭერისკენ მოუწოდებს.

„პარტია „თავისუფალი დემოკრატები“ მოსახლეობას და მოქალაქეებს ვაფრთხილებთ, საკონსტიტუციო უმრავლესობის საფრთხეზე. ყოველთვის საფრთხეა, როდესაც ერთი გუნდის ხელში ხდება ასეთი ძალაუფლების კონსოლიდაცია, მაგრამ ჩვენ, „თავისუფალი დემოკრატები“ არც ერთი პარტიის მხარდაჭერისკენ არ მოვუწოდებთ არც ერთ მოქალაქეს, რადგან ჩვენ მიგვაჩნია, რომ მოქალაქეებმა თვითონ უნდა გააცნობიერონ საფრთხეები, თვითონ მიიღონ გადაწყვეტილება, გააკეთონ არჩევანი და პასუხისმგებლობა აიღონ ამ არჩევანზე. ჩვენ, „თავისუფალი დემოკრატები“ მოვუწოდებთ მხოლოდ „თავისუფალი დემოკრატების“ კანდიდატის ჭიათურაში თემურ გაფრინდაშვილის მხარდაჭერისკენ და ჩვენ ყველანი ჩავალთ იქ და ერთად ვიბრძოლებთ გამარჯვებისთვის“, - განაცხადა ნინო გოგუაძემ.

მონიკა დავლიანიძე