კომენტარი

თამაზ მეჭიაური და მისი შტაბი პროვოკაციებს არ ერიდებიან - ,,ქართული ოცნების“ თიანეთის მერობის კანდიდატი

დარწმუნებული ვარ, რომ სასამართლო სიმართლის მხარეს დაიჭერს და მე გავხდები თიანეთის მერი, - აცხადებს „ქართული ოცნების“ მერობის კანდიდატი ლელა ქიტესაშვილი და აღნიშნულით თამაზ მეჭიაურის საჩივარს გამოეხმაურა.

,,პირველი არხისთვის“ მიცემულ ინტერვიუში ლელა ქიტესაშვილი ამბობს, რომ ხმების გადათვლის პროცესი თიანეთის საოლქო კომისიაში წესისა და კანონის დაცვით ჩატარდა.

„სწორედ ჩვენი სარჩელით მოხდა გადათვლა ბათილი ბიულეტენების, სადაც აღმოჩნდა 5 ბიულეტენი, რომელზეც ჩემი გვარი იყო შემოხაზული და ამან შეცვალა შედეგიც“, - განაცხადა ქიტესაშვილმა.

,,ქართული ოცნების“ წევრი კონკურენტ კანდიდატს თამაზ მეჭიაურს პროვოკაციებში ადანაშაულებს.

„თამაზ მეჭიაური და მისი შტაბი პროვოკაციებს არ ერიდებიან. ბევრ რამეს ამბობენ, მაგრამ მე მაქვს სიმართლისა და ობიექტურობის იმედი და მეჭიაურს მოუწევს აღიაროს მარცხი“, - აცხადებს "ქართული ოცნების" მერობის კანდიდატი.

ცნობისათვის, ლელა ქიტესაშვილს, ცესკო-ს ოფიციალური მონაცემებით, თიანეთში ხმების 50.03% აქვს მიღებული და ის თამაზ მეჭიაურს ოთხი ხმით უსწრებს.

ნინო ექვთიმიშვილი