მსოფლიო

ტაილანდის გამოქვაბულიდან ყველა მოზარდისა და მათი მწვრთნელის გამოყვანა შეძლეს

ტაილანდის ჩრდილოეთით მდებარე ტჰამ ლუანგის მღვიმედან ყველა 12-ვე მოზარდი და მათი საფეხბურთო მწვრთნელი გამოიყვანეს. ამის შესახებ ფეისბუკის საკუთარ გვერდზე ტაილანდის საზღვაო ქვედანაყოფი იუწყება.

„ყველა უსაფრთხოდაა“, -წერია ფეისბუკპოსტში.

ცნობისთვის, სამი დღის განმავლობაში ტაილანდელი მაშველები უცხოელ კოლეგებთან ერთად გამოქვაბულში ჩარჩენილი 12 მოზარდისა და მათი მწვრთნელის საევაკუაციო ოპერაციას ატარებდნენ.

23 ივნისს 11-დან 17 წლამდე ასაკის ბავშვები თავის მწვრთნელთან ერთად გამოქვაბულში ჩარჩნენ უეცრად წამოსული ძლიერი წვიმის გამო, რომელმაც იქაურობა წყლით დაფარა. მოზარდები და მათი მწვრთნელი ბრიტანელმა მყვინთავებმა 9-დღიანი ძებნის შემდეგ აღმოაჩინეს გამოქვაბულის სიღრმეში, შესასვლელიდან ოთხი კილომეტრის მანძილზე.