მსოფლიო

სულ უფრო მეტი მტკიცებულებაა, რომ რუსეთი კონტინენტალური მასშტაბის ომისთვის ემზადება - პეტრო პოროშენკო

„სულ უფრო მეტი მტკიცებულებაა, რომ რუსეთი კონტინენტალური მასშტაბის ომისთვის ემზადება“, - რუსეთისგან მიმავალ საფრთხეებზე უკრაინის პრეზიდენტმა პეტრო პოროშენკომ უმაღლეს რადაში გამოსვლის დროს განაცხადა. მისი თქმით, სამხედრო გამოწვევას ბელორუსიაში დაგეგმილი სამხედრო წვრთნები „Запад-2017“ წარმოადგენს.

„რუსეთისგან ძირითადი სამხედრო საფრთხე არსებობს. ჯერ არაა რამე ნიშანი, რომ მოსკოვი მზადაა, გავიდეს დონბასიდან ან დატოვოს ყირიმი. თუმცა სულ უფრო მეტი მტკიცებულებაა, რომ რუსეთი კონტინენტალური მასშტაბის ომისთვის ემზადება. მაგალითად, იგივე რუსულ-ბელორუსული წვრთნები Запад-2017, თუმცა ლოგიკურია მას დავარქვათ „ანტი-დასავლეთი“ “, - განცხადა უკრაინის პირველმა პირმა.

პოროშენკომ არ გამორიცხა, რომ სამხედრო სწავლებების დროს რუსეთმა უკრაინაში შესაჭრელად ახალი სამხედრო დაჯგუფებები შექმნას.

„სამეთაურო-საშტაბო სწავლებების იქით არაა გამორიცხული რუსული ჯარის ახალი დამრტყმელი დაჯგუფებების შექმნა უკრაინის ტერიტორიაზე შესაჭრელად. 7 ათასი პლატფორმა ტექნიკითა და ჯარისკაცებით ჩვენს საზღვარს უახლოვდება და, სამწუხაროდ, არ არსებობს გარანტიები, რომ მანევრების დასრულებისთანავე ისინი ბელორუსიიდან რუსეთში მიბრუნდებიან“, -აღნიშნა პოროშენკომ.

რუსეთისა და ბელორუსიის ერთობლივი სამხედრო სწავლებები „Запад-2017“ 14-დან 20 სექტემბრამდე გაგრძელდება. ოფიციალურად მასში მონაწილეობა 13 ათასამდე ჯარისკაცმა უნდა მიიღოს, თუმცა არაოფიციალური მონაცემები ბევრად უფრო მეტ სამხედროზე - 100 ათას ადამიანამდე მიუთითებს. სწავლებები ორ ეტაპად ჩატარდება - რუსეთის ფედერაციის ტერიტორიასა და ბელორუსიის შვიდ პოლიგონზე.

ანა მებურიშვილი