კომენტარი

სტრუქტურა არ უნდა იყოს უსაფრთხოების სისტემაში - უჩა ნანუაშვილი

საუბარი როდესაც არის მოსმენებზე, აუცილებელია გავითვალისწინოთ ის რეალობა, რომელიც ქვეყანაში არსებობს, - განაცხადა სახალხო დამცველმა უჩა ნანუაშვილმა ფარულ მოსმენებთან დაკავშირებით შემუშავებულ კანონპროექტის კომენტირებისას.

მისი თქმით, უსაფრთხოების სამსახურს და სამართალდამცველებს არ აქვთ ის ნდობა საზოგადოებაში, რომ თუკი მათ სისტემაში იქნება ახალი სტრუქტურა, კითხვის ნიშნები კვლავ არ დარჩეს.

"აქ საუბარია იმაზე, რომ სწორედ ეს სისტემა იყო ჩართული უკანონო მოსმენებში წლების განმავლობაში და აქედან გამომდინარე, საზოგადოებაში უნდობლობა ნამდვილად არსებობს, თუკი დარჩება აღნიშნული სტრუქტურა ამ სისტემაში. ჩვენ მხარს ვუჭერს ამ სტრუქტურის გარეთ გამოსვლას, ახალი სტრუქტურა არ უნდა იყოს უსაფრთხოების სისტემაში", - აღნიშნა უჩა ნანუაშვილმა.

ცნობისათვის: პარლამენტმა დღეს ფარულ საგამოძიებო მოქმედებებთან დაკავშირებული საკანონმდებლო ინიციატივის განხილვა დაიწყო.

საკანონმდებლო პაკეტს თავდაცვისა და უშიშროების და ადამიანის უფლებათა დაცვის კომიტეტების გაერთიანებულ სხდომაზე მხარი უკვე დაუჭირეს. პროექტის განხილვა იურიდიულ საკითხთა კომიტეტში გაგრძელდება. საკითხი დღესვე პირველი მოსმენით პლენარულ სხდომაზე გავა.

ნინო ექვთიმიშვილი