კომენტარი

სტრასბურგის სასამართლომ მიიღო გადაწყვეტილება, რომელიც აქამდე არ მიუღია - თამარ ჩუგოშვილი

ჩვენ სრული მხარდაჭერა გვაქვს ევროპული სტრუქტურების მიმართ და შესაბამისად, ვიქცევით ისე, როგორც შეეფერება ევროსაბჭოს ღირსეულ წევრებს, - ასე გამოეხმაურა ჟურნალისტებთან საუბრისას პარლამენტის ვიცე-სპიკერი, თამარ ჩუგოშვილი რუსთავი 2-ის საქმეზე სტრასბურგის სასამართლოს გადაწყვეტილებასთან დაკავშირებით ეკონომიკის მინისტრის, გიორგი გახარიას განცხადებას.

“სტრასბურგის სასამართლომ მიიღო გადაწყვეტილება, რომელიც აქამდე არ მიუღია, კონკრეტულად ამ მუხლებთან დაკავშირებით, შეჩერების მექანიზმი გამოყენებული არ ყოფილა. ამან, რა თქმა უნდა, გარკვეული კითხვები თუ გაკვირვება გამოიწვია. მე მქონდა შესაძლებლობა, რომ სხვადასხვა პირებს გავსაუბრებოდი ამ საკითხთან დაკავშირებით. მეტს ვერაფერს ვიტყვი, რადგან ეს არის სასამართლო, ძალიან მაღალი რეპუტაციის მქონე. ჩვენ სრული პატივისცემა გვაქვს ევროპული სტრუქტურების მიმართ და შესაბამისად, ვიქცევით ისე, როგორც შეეფერება ევროსაბჭოს ღირსეულ წევრებს და ვასრულებთ გადაწყვეტილებას”, - განაცხადა თამარ ჩუგოშვილმა.

ცნობისათვის: ეკონომიკის მინისტრის, გიორგი გახარიას თქმით, ქვეყანაში, სადაც ტელევიზიის დარეგისტრირებისთვის 10 დღეა საჭირო, სიტყვისა და გამოხატვის თავისუფლების საკითხთან დაკავშირებით კითხვის ნიშნები არ ესმის.

,,აღსრულების მექანიზმის მსგავს შეჩერებას და საკუთრების, რანჟირების პირობებში, უფრო დაბლა დაყენება, ვიდრე გამოხატვის უფლება, ჩემთვის პრობლემაა და ვთვლი, რომ არ არის ერთმნიშვნელოვანი და ეს საკმაოდ სერიოზული გადაწყვეტილებების და მსჯელობის საგანი უნდა იყოს", - განაცხადა გახარიამ.

ნინო ექვთიმიშვილი