კომენტარი

სპეცოპერაციის შემდეგად კლუბს ათობით ათასი ლარის ზარალი მიადგა - კლუბ `ბასიანის` მფლობელი

კლუბ "ბასიანის" მფლობელი ტატო გეთია ამბობს, რომ 12 მაისის სპეცოპერაციის შემდეგად კლუბს ათობით ათასი ლარის ზარალი მიადგა.

მისი თქმით, კლუბი ამ დრომდე დალუქულია შესაბამისად უცნობია დაზიანებულია თუ არა აპარატურა.

„პარასკევთან დაკავშირებულ კონკრეტულ ზარალს, ეს რამდენიმე ათეული ათასი ლარის ოდენობის არის, ვინაიდან, ღონისძიება სრულიად ჩაიშალა. რაც შეეხება სხვა დანარჩენს, რაც არის აპარატურა და სხვა მსგავსი აღჭურვილობა, ამასთან დაკავშირებით მე ინფორმაცია არ მაქვს, კლუბი კვლავ დალუქულია და შიგნით არავის არ უშვებენ. შესაბამისად, ჩვენ არ ვიცი იქ ზიანი აქვს თუ არა მიყენებული სხვადასხვა აპარატურას,"-აცხადებს გეთია.

მისივე თქმით, დღეს შინაგან საქმეთა მინისტრთან შეხვედრაზე მომხდარის დეტალები არ განუხილავთ, საუბარი მხოლოდ იმ ჯგუფების შექმნას შეეხო, რომელმაც შესაძლო გადაცდომები უნდა შეისწავლოს.

კლუბ "ბასიანის" მფლობელის ინფორმაციით, ხვალ სამინისტროში დაგეგმილია შეხვედრა, რომელსაც თავად მინისტრიც დაესწრება. შეხვედრაზე კი უშუალოდ კლუბ „ბასიანში“ და მის მიმდებარედ განვითარებულ მოვლენებს განიხილავენ.

მისივე ინფორმაციით, ხვალვე განიხილება კლუბ „ბასიანის“ გახსნის საკითხი.

„როდის გაიხსნება „ბასიანი“ – ეს საკითხიც განიხილება ხვალ. ეს ძალიან მსხვრევადი საკითხია, ძალიან დიდი დაფიქრება და ყურადღება სჭირდება. შესაბამისად, კიდევ ერთხელ ვიმეორებ, ყველაფერი მოვიტოვეთ ხვალ, ვინაიდან არ არის ერთი, ორი და სამი კაცის, ან კლუბის აქცია. ეს არის ხალხის ხმა. შესაბამისად, ჩვენ გვჭირდება ლეგიტიმაცია ჩვენივე თანამებრძოლებისგან, ამ შეხვედრებზე დეტალურად რომ გავიაროთ ეს ყველაფერი. ვალდებულები ვიყავით, რომ ეს ფორმატი დღეს დაგვედგინა და უფრო მომზადებულები შევხვედროდით ერთმანეთს“, – განაცხადა გეთიამ.

შეგახსენებთ, რომ თბილისში ღამის კლუბები ისევ დალუქულია. "ბასიანისა" და კაფე "გალერის" მიმდებარე ტერიტორიას ჯერაც სამართალდამცველები აკონტროლებენ.